Na ka Tourist Sumo ïoh kurup drok ki pulit ka Ri Bhoi ba thmu shalan na Guwahati sha Shillong

Nongpoh, Rymphang 17: Katba dang ïaid ka jingpynkhreh ban jied ïa ki nongmihkhmat hapoh ka jylla bad la pyntreikam pyrkhing ïa ki kyndon jong ka Model Code of Conduct ban ïaid beit ïaid ryntih ka jingjied ïa kita ki nongmihkhmat paidbah hapoh ka jylla, ki Pulit ka Ri Bhoi hynnin ka janmiet ki la ioh kem ïa uwei u briew ba thmu ban shalan tuh ïa u drok na Guwhati sha Nongbah Shillong.
Katkum ka khubor ba la ioh lum na ki Pulit ka Ri Bhoi, la ong ba ki bor pulit ki la ioh jingtip lypa ba la don uwei u briew uba thmu ba shalan tuh ïa u drok na Guwhati sha Shillong bad dei halor kane ka nongrim la pynap shrip ha Umsning ba la ioh ban bat ïa kawei ka Kali kaba la suba kit ïa u drok.
Da ka jingpynap shrip ha ka por 8 baje ei ei mynmiet, ki pulit ki la ioh ban bat ïa kawei ka Tourist Sumo kaba don ïa u Number ML 05-S-6642 bad kem ruh ïa u suba nongshalan beain ïa u drok ba la tip kyrteng kum u Anup Sen uba dei na Laban Shillong; Ha ka jingtalasi ïa katei ka Kali la ioh ruh ban kurup 2 tylli ki synduk ba la song ïa u drok ryngkat ka pisa kaba T. 10880 lem bad kawei ka Mobile bad ka EPIC Card na utei u briew, ong ka tyllong khubor na ki Pulit ka Ri Bhoi.
La ong ruh ba utei u briew ba la suba shalan beaiñ ïa u drok, u la pyrshang ruh ban buhrieh ïa u drok ha ki bynta barieh jong ka Tourist Sumo bad da ka jingtalasi ki bor pulit la ioh ban kurup ïa kitei ki tiar bad kynthup u drok.
La ïathuh ruh ba na ka liang ki bor pulit ki la tohkit ruh ban pynshisha ïa u drok lyngba ka NDPS kit bad katkum ka jingpynshisha da katei ka kor ka bor la tip ba u dei uta u drok heroin uba don ka jingkhia 22.34 gram.
Shuh shuh, la pynlong ruh ïa kata ka jingtohkit kaba bniah katkum ki kyndon ka NDPS act bad register case ïa utei u rangbah bad hadien kata la kem noh ïa une u briew na ka bynta ka jingtohkit kaba kham bniah halor kane kam ba la kynnoh ba u don kti ban shalan beaiñ ïa u drok, pynkut ka tyllong khubor na ki Pulit ka Ri Bhoi.