Nongpoh Rymphang 17: Katba ki sngi ban jied thymmai ïa ki nongmihkhmat paidbah sha ka ïing Dobar thaw aiñ ka jylla ka la dang jan bad ruh ba ka jingpynkhreh na ka liang ka election commission ka ri India ka la dang ïaid shaphrang, na ka liang u District Election Officer ka Ri Bhoi mynta ka sngi u la pynmih ïa kiba bun ki kyndon ba dei ban bud khang ban ïaid beit ïaid ryntih kane ka election jied nongmihkhmat hapoh ka jylla.
La pynmih ruh ïa kine ki kyndon ba hap ban bud ryntih ka dei shi bynta ruh ba na ka liang ki party bapher bapher ki la pynkhreh ïa ki jingïalang paidbah bapher ban ïalap lection da ka jingdon ki nongïalam election ba paw bad ruh ba kan nym ktah pat ïa ka jingpynkhreh ban ïaid beit ïaid ryntih kane ka election jied nongmihkhmat.
Na ka liang u District Election Officer ka Ri Bhoi, u la pynjari da ki kyndon aiñ ha kaba la khang pyrshah ban pynïeng ne tah ïa ki lama ne ki poster ha ki jaka sorkar ne ki jaka ki riew shimet khlem da ioh bor na ka ophis u District Election Officer ka Ri Bhoi.
Kane ka jingkhang ban wah lame ne tah ïa ki poster ha ki jaka sorkar ne ki jaka shimet khlem da ioh bor, ka dei na ka bynta kane ka jingïalap election da ki party bapher bapher hapoh ka District bad na ka bynta ki lama ne ki poster kiba dei na ka bynta ki kam jong ka sorkar bym don jingïadei bad ka kam election kam don kano kano ka jingkhang pyrshah ban wah ne tah ha ki jaka sorkar ne wat ha ki jaka jong ki riew shimet lada ki la ioh born na ki trai ne ne ka sorkar lada dei ha ki jaka jong ka sorkar.
La mandar uh ïa ki kyrtong ba kim dei ban pyndonkam ïa ki jaka ki riew shimet ne ki jaka sorkar ban pynlong ïa kino kino ki jingïalang paidbah khlem da ioh bor bad ha ka jingïalap election kino kino ki party ki dei ban ïa burom kylliang khlem da pynmih ïa kino kino ki kynrum ki kynram kiba ktah ïa ka shongsuk shongsain ki paidbah bad khamtam na ka bynta ka jingpynkhreh ïa kane ka election jied nongmihkhmat.
Ka ophis u District Election Officer lyngba katei ka kyndon ka la mana ruh ban nym dei ban pynmih kano kano ka huri hura lane ban pynthud ïa ki jingïalang ïalap election jong kino kino ki kyrtong lane ban pynjot pynpra ïa ki poster lane ki lama bad kum ki kyrtong bad ki nongbud jongki ki dei ban ïa burom mar kylliang lada dei jong kano kano ka political party ruh. Kino kino kiba pynkhein kin ngat ha ka jingpynshitom katkum ka Section 127 jong ka Representation People Act, 1951.
La khang ruh ïa ki kyrtong ban ïalap election hapoh ka 100 metre hajan ka Polling Station bad kito ki kyrtong kiba ïalap election hapoh ka 100 metre na ka Polling Station ki la pynkheiñ ïa ka Section130 jong ka Representation jong ka People Act, 1951.
Shuh shuh, lada pynlong ïa kino kino ki jingïalap election dei ban pyntip sha ki bor pulit bad dei ruh ban pan bor ha ka por kaba biang. Wat ban pyndonkam ïa ki kor jingsawa na ka bynta ka jingïalang ïalap election dei ban ioh bor shwa na ka ophis u District Election Officer. La mana ruh ban nym pynthud ïa ka hok thep vote jong uno uno u nongshong shnong ba la ioh ïa ka hok ban thep vote bad ruh ban pynthud ïa ka shongsuk shongsain ki paidbah.
