Na ka tnad UDP (O) yn ïakhun u Bah Bindo, ther ïa ki kyrtong na Nongkrem

Shillong, K’lyngkot 20: U Bah Bindo Matthew Lanong, uwei na ki nongseng jong ka UDP, u la ïathuh ba un ïakhun ïa ka elekshon MLA 2023 na ka tnad jong ka UDP kaba u ong ka UDP (Original).
Haba ïakren bad ki nongthoh khubor mynta ka sngi ha Shillong Club, u Bah Bindo uba la shah pynduh ticket ha ka UDP namar ba la ai ha u Bah Lambor Malngiang, MLA ba mynta ka Nongkrem, u la ong ba ym dei ma u, uba kwah ban mih na ka UDP, hynrei dei ki nongïalam ki bym kwah ïa u ban un ïakhun na ka UDP namar ba ki kwah ban ai ticket ïa ki briew kiba don dak sniew lane ki riew jaboh bad kim kwah ban ai ticket ha ki briew kiba khuid kum ma u.
“Ki kam ba kin ïoh 30 ngut ha kane ka elekshon, kine kin ïoh 30 ngut?, lada don ma nga 15 ngut ki jop tharai, hynrei mynta te wat tang 10 ngut ruh kim jop”, la ong u Bah Bindo.
U la ong ruh ba wat lada um ïakhun na ka UDP, hynrei un nym mih satia na ka UDP ne un nym pynpait ïa ka UDP, hynrei kan long tang ka tnad jong ka UDP.
U la pynpaw ka jingsngewsih ba ka UDP ka kyntait ïa u, wat lada udei u nongseng jong ka Party naduh ka snem 1997 bad u la ïai neh ha ka Party haduh mynta. Hynrei ki nongïalam pat ki la ai ïa ka ticket ha u Bah Lambor Malngiang, u bym dei satia u briew jong ka Party bad uba la phet ruh bun tylli ki Party.
U la ther tyngeh ruh ïa u Bah Dasakhiat Lamare, u kyrtong jong ka NPP uba la wan phet na Mawhati sha Nongkrem ha kane ka elekshon 2023. U Bah Bindo u la ong ba ki paidbah Nongkrem kin sa ai jingsneng ïa u namar ka jingleh beiñ ïa ki paidbah Mawhati. “Phin sa ïohi ïa ka result kaei kaba ki paidbah kin jubab”, u la ong.
U la ïathuh ba ki briew na Mawhati ki la ong ïa u (Bah Bindo) ba ki la ai jingsneng ïa u kpa bad ka la dei sa ka pali ki Nongkrem ban ai jingsneng sa ïa u khun. U kpa jong u Bah Dasakhiat udei u Bah Ngaitlang Dhar, uba la shah rem ha ka elekshon MLA ha ka snem 2018 na Umroi ha u Bah George B. Lyngdoh.
U MLA barim ka Malki, u la kynnoh ba u Bah Dasakhiat, u la kit da ki trok ki nep ban leit sam sha ki paidbah jong ka Nongkrem ban pynbeit ïa ki paidbah. U la sam ruh ïa ki paidbah mar mar 5000 tyngka. Shuh shuh u la kynnoh ba kane ka jingsam pisa ka long hakhmat jong ki Pulit bad kane ka la jia ha Madanryting, ha kaba ki Pulit ki la don lang hajan bad pynbeit kali ha kane ka jingïalang. “Ki Pulit ki don lang ha katei ka jingïalang ba sam pisa u Bah Dasakhiat”, la ong u Bah Bindo da kaba bynrap ba ki la don kiba ujor ruh ïa kane ka jingsam pisa sha ka Election Department.