Shillong, K’lyngkot, 20: Ka Sorkar Jylla lyngba ka jingpynbna ba la pynmih da u Commissioner & Secretary ka tnat Pule Puthi ka Sorkar Jylla ha ka sngi Thohdieng ka la bthah ïa baroh ki skul Deficit ban siew ïa ka Contributory Provident Fund (CPF) lane ka National Pension Scheme (NPS) sha baroh ki nonghikai bad ki nongtrei.
Da kane ka jingpynbna la bthah ba ki nonghikai bad ki nongtrei jong ki skul Deficit kiba la shah thung ha ki Sanction Post, bad kiba rung kam shuwa ka 1 tarik Ïaïong, 2010 kin ïai bteng ban ïoh da ka CPF bad kito kiba rungkam hadien ka 1 tarik Ïaïong 2010 shaneng kin shah kynthup ha ka National Pension Scheme (NPS).
Ka jingpynbna ka ong ba lada ki skul Deficit kim lah ban ai la ka dei ka CPF ne ka NPS sha ki nongtrei kin hap ban shim ïa ka jingkitkhlieh.
Kane ka jingbthah kan treikam noh mardor naduh ba la pynmih kane ka jingpynbna.
Ka Sorkar Jylla ka la pynbna paidbah ïa ka Screening Committee na ka bynta ban jied ïa ki PMSHRI School ha ka jylla Meghalaya.
Katkum u kyrwoh na u Commissioner & Secretary ka tnat Pule Puthi ka Sorkar Jylla, la pyntip ba ka Komiti kan kynthup ïa u Commissioner & Secretary ka tnat Pule Puthi & State Mission Director, SSA-SEMAM kum u Chairman; u State Project Director ka SSA-SEMAM bad Director of School Education & Literacy kum u Member Secretary bad u Secretary ka tnat Pule Puthi, Educational Research & Training, u Secretary ka tnat Higher Education, u Deputy Secretary ka tnat Pule Puthi bad u Deputy State Project Director ka SSA-SEMAM kum ki.
Ki kyndon jong kane ka komiti ki long ban pynshisha ïa ki jingkam ba la ai jingtip da ki skul bad ban ai jingmut halor ka thup kyrteng jongki skul sha ka Ministry bad ban ai jingmut ruh ha kaba ïadei bad ka jingthmu ban pynrung ïa ki skul ha ka wat kaba ar (Phase-II).
