Shillong, K’lyngkot 20: U Bah Tarcisius Mawlot, u rangbah ba shong ba sah ha Pyndemumïong, Mairang, u la rai ban ïakhun ïa ka elekshon MLA na Mawlai Constituency, bad kane kam dei ka rai jong u, hynrei kadei ka ‘jingpynsngew U Blei’.
U Bah Tarcis uba la ju mih teng sha ki lympung u la ong ba u la pynkhreh ïa kane ka elekshon naduh u bnai Kyllalyngkot jong ka snem baladep da kaba thoh ïa ki ishu bad ki mat ïaleh elekshon, hynrei ynda u la pule bha, U Blei U la pynsngew ha u ba kine ki mat kim biang bad u la phah pom noh ïa ki baroh. “Hangta nga sngewthuh ba kadei ka jingpynsngew u mynsiem jong u Blei ba ngan ïakhun ïa ka elekshon, namar nga la dem ban duwai ha U Blei”, u la ïathuh.
Haba la kylli na ka Constituency aiu un ïakhun, u Bah Mawlot, u la ïathuh ba ha ka jingshisha u kwah ban ïakhun na Mairang ne na Nongstoiñ, hynrei U Blei U la pynphai ïa u ban leit ïakhun na Mawlai. U la ïathuh ba u la ïasaid bad U Blei ba kumno un leit ïakhun na Mawlai, namar um dei na Mawlai, wat lada ki don ki khhun jong u ba shong ba sah ha Mawlai Umsaw bad u don ruh tang katto katne ki paralok ba u ju ithuh.
Hynrei u la ong ba U Blei u la ong ha u, “Me mut ban ïakhun bad kita ki briew ne me mut ban ïakhun ba nga”. Hadien kane u la ong ba u la panmap na U Blei bad u la kohnguh ban leit ïakhun na Mawlai kum u kyrtong shimet.
Une u rangbah uba ha u snem 1997 por ba dap 25 snem ne Jubili Rupa ka jylla Meghalaya u la pynlong ka jingshah thngan marwei ha u mot laidong ha State Central Library, u la ong ba ka daw ba u la mih ban ïakhun ïa kane ka elekshon kadei namar ba ka jylla mynta kam don shuh ki nongthaw aiñ lane ki nongmihkhmat mynta kim dei shuh ki nongthaw aiñ, hynrei la shu pynbiet da ki kam pynroi ne ka development, katba ka jaidbynriew pat ka la nang shah thombor na kiba bun ki liang, namar bym don ki aiñ ban ïada. Hynrei ki kam pynroi ba ki leh ruh kidei kiba la shu leh tangdep tang ban shu pynbieit ïa ki paidbah.
