Shillong, Nailur 08: Ki pulit jong ka East Khasi Hills kum shi bynta ban bteng biang ïa ka jingkhynra kyiad ba khaiï beaiñ bad ki kam runar hapoh ka Nongbah, ki la pynlong biang ïa ka jingkhynra bad ban ïoh kurup haduh 250 litar ka kyiad ba khaiï be-aiñ ha kaba kane ka jingkhynra ka la long ha mied jong ka sngi saitjaiñ.
La iathuh ba kane ka kyiad ka kynthup ïa 50 litar ka kyiad phareng (IMFL) bad palat 200 liter ka kyiad pyrsi ne kyiad Khasi.
Ki pulit ki la iathuh ba ïa kane ka jingkhynra la pynlong ha ka thaiñ Sadar, Polo, Urkaliar, Laitumkhrah, Madanrting bad Mawblei.
Ha kane ka jingkhynra, ki Pulit kila leit tehlakam ruh ïa ki jingtem jingrwai ba pynheh sur ha ki kali ba pynïeng harud surok, ka jingbat ïa ki kali ba ñiah da kiba la shoh khaw-ïang ne kiba la buaid bad kiwei kiwei pat ki kam kiba ktah ïa ka ïaid ka ïeng jong ki paidbah.
Ki la ong ba na ka liang jong ki pulit ka East Khasi Hills kin ïai bteng ïa kane ka jingkhynra ban wanrah ïa ka jinglong ba shngaiñ bad kaba suk ba saiñ ïa ki paidbah, bad kumjuh na ka bynta ka suk ka saiñ ha nongbah Shillong.
