Shillong, Nailur 08: Ki Pulit ka Jylla Tripura ki la ïoh kem ïa 7 ngut ki Rohingya kynthup ïa 2 ngut ki kynthei bad 10 ngut ki nong Bangladesh na kylleng ki jaka jong ka Jylla ha ki 24 kynta ba la leit noh.
Katkum ka jingong ki Pulit, uwei u nong India uba ïarap pynrung ïa kine ki nongwei ula shah kem lang ha kane ka jingjia.
U Heh Pulit u pyntip ba 4 ngut ki nong Bangladesh kila shah kem na Dharmanagar ha North Tripura District kaba don ha khappud ka Assam.
Ki 7 ngut ki Rohingya ki la shah kem hadien ba ki Pulit ki la buh ïa ka khyrdop talasi ha ryngkat ki shipai BSF ha Amtali, kaba don ha khapsor. Ïa kane ka khyrdop la buh hadien ka jingïoh khubor ïa ka jingïaid lynti jong kine ki briew.
Katba 6 ngut ki nong Bangladesh bad uwei u nong India ba ïarap pynrung beaiñ na khappud, ki la shah kem ha ki Pulit na Karbook kaba hab hapoh ka Gomati District.
Kat kum ka khubor, ha kine ki 3 bnai ba la leit, palat 332 ngut ki nong Bangladesh bad 41 ngut ki Rohingya ki la shah kem ha ki Pulit ka Tnad Railway, ki BSF bad ki Pulit ka Jylla Tripura na kylleng ki jaka.
