Shillong, Nophrah 02 : Ki nongïalehkai jong ki jait jingïalehkai bapher bapher jong ka jylla kiba la ïoh ban khur takma ha ka 2nd North East Olympic Games 2022 hynne ka sngi Thohdieng ki la shah pynkup burom ha ka sorkar jylla lyngba ki song pisa bad ki syrnot.
Ïa katei ka jingïalang pynkup burom ïa ki 188 ngut ki nongïalehkai bad 54 ngut ki coach la pynlong ha U Soso Tham Auditorium, Shillong ha kaba u Myntri Rangbah ka Jylla u Conrad K Sangma u la don lang kum u kongsan bad sam ruh ïa ki khusnam sha ki nongïalehkai.
Ha kane ka sngi la ïadonlang ruh ki ophisar jong ka tnad Directorate of Sports and Youth Affairs, ki nongkitkam jong ka Meghalaya State Olympic Association (MSOA) ba kynthup u Bah John F Kharshiing uba dei u Working President, Bah Finely L Pariat General Secretary, ki nongkitkam jong ki state association, ki nongïalehkai bad kiwei kiwei.
U Myntri Rangbah ha kane ka sngi u la pyllait paidbah ruh ïa ka bai bam ne ka scolarship na bynta ki nongïalehkai kiba ïoh ban khur takma la ka long ha ki lympung ïalehkai hapoh ka jylla, shabar na la ka jong ka jylla bad shaduh ki jingïalehkai shabar ri.
U Myntri Rangbah haba ai jingkren ha kane ka sngi u la pynpaw ka jingsngewkmen ba katei ka prokram ka la long ruh dei lyngba ki nongïalehkai kiba la lah ban ïalehkai bha bad khur takma ha ka 2nd North East Olympic Games 2022 bad u la kyrkhu kyrdoh ruh ba kin nang lah ban ïalehkai bha ha ki jingïalehkai ba dang wan.
U Myntri Rangbah u la ong ruh ba ka sorkar jylla kan dang ïai bteng ban ai ka jingkyrshan na bynta ki nongïalehkai la ka long ha ka liang ka song pisa, ki jaka ïalehkai kiba biang khnang ba kin lah ban nang kiew shaphrang ha ki kam ïalehkai.
U la ong ruh ba da ka jingïatreilang ryngkat bad ka sorkar ha kawei ka sngi kin sa mih ki nongïalehkai kiban tyngshaiñ na ka bynta ka jylla bad ïa ka ri bad kyrmen skhem ruh ba ha kawei ka sngi kin sa mih shibun ki nongïalehkai kiban long ki khlur bad kiban ïoh ban mih madan ha ki jingïalehkai Olympic. Ha kane ka sngi la pynshongkun ruh ïa ka jingïalang da ki jingrwai na ki samla.
