Na ka AITC, INC, NPP, HSPDP sha ka UDP rung ki nongkyrshan thymmai ha Mawkyrwat

Mawkyrwat, Rymphang 13: Ka United Democratic Party (UDP) jong ka Mawkyrwat Constituency mynta ka sngi ka 12 tarik u Rymphang, 2025 ka la ïoh ban pynlong ka jingïalang paidbah ryngkat ka jingpdiang sngewbha ïa ki nongkyrshan ba dang wan rung thymmai ban long ki nongkyrshan ba pura jong ka United Democratic Party (UDP) ha ka jingïalang ba la pynlong ha phyllaw jong ka ophis treikam jong ka UDP ha Mawkyrwat Constituency.
Lah ban kdew ba kiba la wan ban pynïasoh thymmai sha ka United Democratic Party (UDP) ha Mawkyrwat ki long na ka All Indian Trinamool Congress (AITC), Indian National Congress (INC), National People’s Party (NPP), bad na ka Hill State People’s Democratic Party (HSPDP) ha kaba ïa ki, la ïa ïoh ka jingkren pdiang sngewbha na u bah Renikton Lyngdoh Tongkhar, MLA ka Mawkyrwat Constituency uba dei u Working President jong ka UDP Central Body.
Ha kane ka sngi la ïoh ruh ka jingkren lyngkot na ki nongkyrshan ba rim ba kynthup ïa u bah Donbok Kharjahrin bad u bah Synshar Lyngkhoi, bad kumjuh ruh ka jingkren na ki nongkyrshan kiba dang wan rung thymmai sha ka United Democratic Party (UDP) ba kynthup na ka All Indian Trinamool Congress (AITC), Indian National Congress (INC), National People’s Party (NPP), bad na ka Hill State People’s Democratic Party (HSPDP).
Haba ai jingkren pat na ka liang jong u kyrtong jong ka United Democratic Party (UDP) na ka 25 – Mawkyrwat District Council Constituency, u bah Jessland Roy Nongsiej u la ong ba lada u poi sha ka thong jong ka jingjop ki kam ba u kwah ka long ban pyntyllun ïa ki kam ryngkat u MLA ba mynta kum ka kam jngohkai pyrthei kaba long ka lad ai kam ai jam na ka bynta ki khun samla jong ka dong ka thaiñ. U la ong ruh ba lada ki paidbah ki i-bit ïa u ban pynpoi sha ka thong jong ka jingjop, u kular ban trei na ka bynta u paidbah da ka jingkhuid, un ai ruh ka jingïatreilang bad u MLA ban wanrah ki kam kiba ïa dei bad u paidbah.
Namarkata, u buh ka jingkyrpad ïa ki paidbah ba kin ai lem ka jingkyrshan ïa ka UDP kaba long ka seng saiñ pyrthei riew lum kaba heh tam hapoh ka jylla Meghalaya ha kaba ka don mynta 12 ngut ki MLA bad 7 ngut ki MDC na ka KHADC bad 6 ngut na ka JHADC ha kaba ha ka ka don ruh ïa ka jingthmu ba lada kin jop kin long ki nongïada ïa ki riti ki dustur, ka jinglong trai ïa ka khyndew ka shyiap, ki aiñ ki kanun, ka jinglong kyrpad jong ka jait bynriew bad kiwei de ki kam.
Haba kren halor ka jingïaid lynti jong u ha ka kam saiñ hima sima u la ong, “Na ka kam kieng pla bad rah tiar pynsaw ha ki phew snem kiba la leit noh, hynrei ha ki snem nga la ïoh shibun ki jinghikai kumno ban long nongïalam ha ka imlang ka sahlang kumta mynta sha ka kyrdan kum u kyrtong uba sa ïa khun ha ka MDC Election 2025”.
“Lada ki paidbah ki ai ka jingkyrshan ban pynjop don burom ïa nga ha kane ka jingïakhun, ngan nym kular ka ksiar ne ka rupa, ne ka spah ka phew hynrei nga kular ba ïa ka jingtrei bad ka jingshakri ka jong nga da ka jingieit”, ong u bah Jessland Roy Nongsiej.