Ka Sorkar Jylla kam pynshlur satia ïa ka kam tih dewïong be-aiñ ha ka jylla, ong u Marcuise

Shillong, Rymphang 13: U Myntri Sorkar jylla u Marcuise N Marak ha ka sngi Palei, ula ong ba ka jingkylli kam mih satia ba ka Sorkar Jylla kan pynshlur ïa ka kam tih dewïong beaiñ bad kiwei kiwei ki kam beaiñ hapoh ka Jylla.
Halor kane u la ong, “Kumno ka Sorkar kan ïatreilang bad kine ki kam beaiñ. Hato phi pyrkhat ba ka Sorkar Jylla kan pyn shlur ïa kum kine ki kam beaiñ?. Ka Sorkar MDA jong ngi ka treikam haba shai bad phi lah ban ïoh ïa ki sienjam ba la shim da u Myntri Rangbah ka Jylla Conrad K Sangma, ka lynti ba u ïalam ïa ka Jylla kaba phi lah ban ïohi hi dalade.”
U Myntri ula ong ba lada don kiba ïohi ïa kine ki kam beaiñ, dei ban wanrah sha ka jingtip jong ka Sorkar namar ngi don hangne ban khang ïa kine kiei kiei baroh.
Na ka liang u Marcuise ula kren ïa kane haba kynthoh ïa ki jingkynnoh jong ki Liang Pyrshah haba kdew ïa ka interim report ba dang shen ba la phah da u Justice (Retired) BP Katakey.
Haba kyntait ba ka don ka jingtih dewïong beaiñ, u Myntri ula ong, “Kam don satia kum kane ka kam ha ka kynhun. Lada ka don, ka bor ka don ban kem ïa ki bad nga tharai ki la don ki nongkhaiñ kiba la dep ban ai jubab kaba la leit sha ki bor District. Ngam tharai ba kan don ka jingtih dewïong beaiñ ha South Garo Hills.”