Na ka 130 tyngka sha ka 30 tyngka shi kilo hiar dor u synsar, lynïar ki paidbah nongrep

Mawkyrwat, Risaw 16: Ki paidbah nongrep kiba hapoh jong ka Manad San Shnong Area ki la hapdeng ka jingnoh mynsiem bad ha kajuh ka por ki la pynpaw ruh ïa ka jingsngewdiaw ha kaba ïadei bad ka jinghiar dor palat ki marrep jong ki katba haba phai ha ki marbam mardih pat kum u khaw, shini, phan, piat ki la nang kiewdor na kawei ka sngi sha kawei pat.
Namarkata, ki paidbah jong ki San tylli ki shnong ba kynthup ïa ka shnong Pyndenlyngdoh, Lummawbah, Manad, Mawbidong, bad Pyndensohlang ki la pynpaw ba kane ka la long kaei kaei ka jingpynduh jingkyrmen ïa ki namar “katba ki rep kata nang syrdep” kum ong ka ktien.
Lah ban kdew ba ïa u synsar, ka sorkar jylla ka la ithuh ïa u kum u mar rep khlaw uba ka dor jong u ha ki snem ba la dep ka poi haduh T. 130/- shi kilo hynrei sngewsih pat mynta ka dor jong u synsar ka long tang T. 30/- tyngka shi kilo. “Ym tang u synsar hynrei kiwei kiwei de ki mar rep kata naduh u ‘la tyrpad, u sohmarit, u kwai bad kiwei ka dor jong ki ka la hiar bha ha kaba tang ïa ka mar shiliang ruh kam kot shuh.
Haba kren ha ki lad pathai khubor, u Chairman jong ka Synjuk ki Rangbah San Shnong Manad Area, u bah Reddy Shylla u la ïathuh ba ki nongrep jong na kane ka dong ka thaiñ San Shnong ki don mynta hapdeng ha ka lynti jong ka jingkyrduh kaba khraw kat shaba ki phai namar ki mar rep jong ki kim ïaid dor shuh. “Bun na ki nongrep kiba rep ïa u synsar bad u sla tyrpad ïa uba ki nongrep ki la dep ban kheit ruh kim kwah shuh ban die”, ong u bah Reddy bad u la shu pyut kai ha ki jaka buh namar ka jingtad dor palat haba phai lei lei ha bai bylla bad bai kit ruh kam mih shuh.
Namarkata, ki paidbah nongrep na ki San tylli ki Shnong ki kyrpad jur ïa ka sorkar khamtam eh ïa ka Myntri ba dei peit ïa ka rep ka riang hapoh ka Jylla Meghalaya ba ki dei ban leh ei ei bad thaw lem ki lad thaw lynti ha kaba ïadei bad kane khnang ba ki nongrep kin nym don hapdeng jong ka jingeh.