Shillong, Risaw, 28: Ki Pulit ka Anti-Narcotic Task Force (ANTF) ka East Khasi Hills ha ka sngi Thohdieng ki la ïohkem saw ngut ki snar nongkhaïi drok na jingkieng Umshyrpi kaba hap hapoh ka Jhalupara Out Post, Shillong.
Ha ka jingtalasi ïa kine ki saw ngut, ki Pulit ki la ïoh kurup 41 tylli ki tyndong ba la thep ïa u drok Heroin uba khia 46.42 gram, saw tylli ki mobile phone, kawei ka pla snieh rong ktieh, uwei u thyrnia injek, kawei ka plastik rong iong, saw tylli ki tyndong ba thylli bad kawei ka kali kaba don ïa u nombar ML05-D-9905
Katkum u kyrwoh ba la phah da u Superintendent of Police (City) Bah Vivek Syiem ïa kine ki saw ngut la pynngat hapoh ki kyndon jong ka NDPS Act bad ka jingtohkit ka dang ïaid shakhmat.
Ha ka sngi Palei ki Pulit ki la ïohkem biang sa saw ngut ki nongdawa pisa jubor na ki nongkhaïi ha Shillong ba kynthup ïa kawei ka kynthei.
Ïa kine ki briew la ïohkem da ki Pulit ka Special Cell ka District na Palace Hotel, Barabazar. Na ka met jong ki, ki Pulit ki la ïoh ban kurup ïa ki receipt jong ka seng ba la ai kyrteng, “Ki Khlur u Hynniewtrep”.
Ki Pulit ki la ïoh pdiang ruh ïa ka ejahar kaba pynpaw ba kine ki briew ki la dawa pisa haduh T. 15,000 ha ka janmiet 26 tarik Risaw bad ki la leit ruh ban lum ïa kane ka pisa ha kane kajuh ka sngi.
Ki Pulit ki la register case ïa kine ki saw ha Lumdiengjri Police Station hapoh ka kyndon 384/506/34 Indian Penal Code (IPC).
