Ka Shillong Parliamentary Constituency ka dei ban sei da u MP uba tbit ban ïasaid ha Parliament ong u Myntri ka NPP

By Mawphor News Desk On Oct 29, 2023

Shillong, Risaw 28 : U nongïalam ka NPP na ri lum Garo uba long ruh u Myntri ka sorkar MDA u Rakkam A Sangma u la ong ba ka Shillong Parliamentary Constituency ka dei ban sei da u MP uba tbit ban ïasaid ha Parliament namar ka dei ka Constituency kaba paw bad kaba la bun kiba nang ba stad.
“ Ka Shillong Constituency ka dei ka Constituency kaba don burom kumta u MP u dei ban long uba tbit bad uba lah ban ïasaid ïatai ha Parliament kumta ha kane ka kynti ka dei ban phah da u MP uba lah da shisha ban pynpaw ïa ka jingtbit jongu ban ïasaid na ka bynta kiba bun ki mat kiba sahteng” ong u Rakkam.
U la pynkynmaw ruh ïa ki mat kiba kongsan kum ka jingpynkylla ïa ka Sixth Schedule, ka jingithuh ïa ki trai ri trai muluk kane ka jylla, ka jingkynthup ïa ka ktien Khasi bad Garo ha ka Khyrnit ba Phra jongka Riti Synshar ka ri India bad kiwei kiwei.
U la ong ba ka jylla Meghalaya ka dei ka jylla kaba rit bad ka shaniah beit nadong shadong ha ka sorkar pdeng kumta u la ong “ Ngi donkam da ka party kaba lah ban pynïasoh ïa ka jylla bad ka Delhi ne bad ka sorkar pdeng khnang ba ngin lah ban pynïaid shakhmat ïa ka jylla”.
U la ïathuh ka NPP ruh kam pat pynbna ïa u kyrtong jongka na ka bynta kane ka Parliamentary Constituency.
U la ong ruh kan long kaba eh bha ïa ki seng kum ka Voice of the People Party(VPP) ban jop ïa ka election MP Lok Sabha. “ Man la ki party ki don la ki jong ki mat bad ka VPP kaba dei ka party ba thymmai ruh ka don hi la ki jong ki mat. Hynrei ki donkam ban poi sha ki kyndong kynshrot jongka ri lum Khasi bad Jaintia hooid kin hap ban trei tangba ka kam ka long kaba jwat bha ïa ki” ong biang u Rakkam.
Tang namar ba dei ka seng saiñ pyrthei kam long kaba suk ban jop ïa ka election MP khamtam lei lei ba heh tang ka ktien, ki hap ban ïarap ïa ki paidbah ha kiba bun ki bynta bad ki donkam ruh ban ai ka jingshakri kaba pynhun ïa ki paidbah. Haba ki paidbah ki wan ïa kynduh ïa phi tang ban sneng bad ai jingmut ïa ki ka la biang, kata kam long da lei lei ruh hynrei donkam ban ïarap bad kdew lynti ruh ïa ki” ong biang u Rakkam. U la ong biang dei na kane ka daw ki paidbah ki phai sha ka party kaba lah ban ai ka jingshakri ïa ki paidbah.
Lah ruh ban pynkynmaw ba ka VPP ka la pynbna ïa u Dr Ricky AJ Syngkon kum u kyrtong MP jongka nangne na Shillong Parliamentary Constituency.