Jowai, Risaw 29: Ka lympung ïalehkai phutbol kaba la tip kum ka “Chatister Kharkongor Memorial Trophy 1st Division Football Tournament – 2023 bala pynïaid da ka West Jaiñtia District Sports Association, (WJDSA) Jowai kaba la long hynnin ka sngi saitjaiñ jong ka taïew ba ladep ha madan Kiang Nangbah Stadium, Dongmihsngi Jowai, ka la jam sha kaba kut ha kaba ka Khliehiongriang ka la khur ïa ka namjop.
Haba bishar ïa ka jingïakhun kaba la long hapdeng ka Khliehiongriang pyrshah ïa ka Luti Tuber SW, ka long shisha kaba itynnat bad ka jingïathep kol ka la wan na baroh arliang ki kynhun, hynrei dei ka Khliehiongriang kaba la ïoh ban thep tam.
Ha kane ka jingïakhun ka Khliehiongriang ka la jop da 4-2 kol, u Same Dkhar u la ïoh ban thep haduh ar kol na bynta ka kynhun kiba la wan haka minit ba 50 & 90+1, nangta na u Arwan Dkhar haka minit ba 73 bad u Founder Passah haka minit ba 79. Katba ïa ki ar kol na ka Luti Tuber SW la thep da u Ribait Lhuid haka minit ba 9 bad u Baiahluti Dhar haka minit ba 5.
Ka jingïakhun mynta ka Lah Sngi U Blei (30 tarik Risaw,2023) kan long hapdeng ka Moosalyngkat pyrshah ïa ka Wahiajer haka por 12 baje shiteng sngi.
