Tura, Kyllalyngkot 19: Ha ka jingïakop sïatkhnam (Archery) ki jingïalehkai ki la jam sha ka final ha ka Meghalaya Games ha kaba ïa baroh ki jingïakhun na ka bynta ban ïaknieh ïa ka nam lahduh yn pynlong lashai ka sngi ka 20 tarik u Kyllalyngkot 2024 ha Montfort Centre of Education School, Tura.
Ki kynhun kiba la jam sha ka final ha ka Indïan Round jong ki kynthei ne Women Team Event ki long ka West Khasi Hills District bad ka East Khasi Hills District. Katba ha ka jingïalehkai kynhun jong ki shynrang ne Men Team Event ki long ka East Khasi Hills District bad ka South West Khasi Hills District.
Ha ka Mixed Team jong ka Revurve ki long ka South West Khasi Hills District bad ka West Jaintïa Hills. Katba ha ka Indïan Round (Mixed Team) ki long ka East Khasi Hills District bad ka Eastern West Khasi Hills District.“ Ïa ka takma rnong ha ka Women Team Event kaba la long hynne ka sngi, la khur da ka Ri Bhoi hadien ba ka la jop ïa ka South Garo Hills District. Ka West Jaintïa Hills District ka la khur ïa ka takma rnong ha ka Men Team Event hadien ba ka la jop ïa ka West Khasi Hills District.
Ka Ri Bhoi ka la khur ruh ïa ka takma rnong ha ka Mixed Team Event hadien ba ka la jop ïa ka Eastern West Khasi Hills District. Ha ka Indïan Round Mixed Team, ka West Khasi Hills District ka la khur ïa ka takma rnong hadien ba ka la jop ïa ka Ri Bhoi District.
