Mynta yn aiti ka HNLC sha ka Sorkar Jylla ïa ka shithi ba la weng na ka jingïakren ïasuk

Shillong, K’lyngkot, 07: Ka seng kieng atiar Hynñiewtrep National Liberation Council (HNLC) kan sa aiti sha ka Sorkar Jylla ha ka Lah Sngi u Blei ïa ka shithi ba la weng noh na ka miej jingïakren ïasuk.
Ïa ka shithi jong ka seng yn sa aiti ha u ksiang ba la thung da ka Sorkar Jylla u Bah P.S Dkhar, ong u nongmihkhmat jong ka HNLC u Bah Sadon K. Blah uba long ruh u President jong ka Hynñiewtrep National Youth Front (HNYF).
Ka Sorkar MDA lyngba u nongaiktien Bah Paul Lyngdoh ka la kyntu ïa ka HNLC ban ym weng na ka jingïakren ïasuk.
Ha ka 3 tarik, Kyllalyngkot, ka HNLC ka la pynbna ïa ka rai ban weng noh na ka miej jingïakren ïasuk kum ka jingpyrshah halor ka jingkynnoh ba ka Sorkar kam shym la shimkhia ban mynjur ïa ki san tylli ki mat jingdawa ba kynthup ruh ïa ka jingmap ei ïa ki dkhot bad ïa ki nongïalam jong ka Seng.
Ka HNLC lyngba u Chairman-cum-C-in-C u Bah Bobby Marweiñ bad u General Secretary-cum-Publicity Secretary u Bah Saiñkupar Nongtraw, ka la phah da ka shithi sha ka Ministry of Home Affairs (MHA) lyngba u Advisor (MHA, Northeast) u A.K.Mishra ban pyntip ïa kane ka rai. Katkum kane ka shithi, ka HNLC ka la pynpaw ba ïa kane ka rai la shim halor ka nongrim ba ka Sorkar kam shym la pynurlong ïa ki mat jingdawa ba ka seng ka la buh hakhmat shwa ban sdang ka jingïakren ïasuk.
Ha u kyrwoh, u Bah Saiñkupar Nongtraw u la ong, “ka jingthmu jong kane ka jingpyntip ka long ba pynbna ïa ka rai ba ka HNLC ka la weng noh na ka miej jingïakren. Ïa kane ka rai la shim kum ka jubab halor ka jingbym shimkhia jong ka Sorkar ban sngap ïa ki jingdawa ba kongsan eh jong ngi.”
U Bah Nongtraw u la ong ba kine ki jingdawa ki dei kiba ladep ban phah sha ka Sorkar India da u General Secretary barim u (L) Bah Cheristerfied Thangkhiew ha ka 16 tarik Kyllalyngkot, 2021.
“Wat hapdeng ki jingtrei shitom ban ïai ban bad ban pynsngew ïa ki jingdawa jong ngi lyngba u nongrah ktien u Bah Sadon Blah, ka Sorkar ka la pyni ïa ka jingbym shimkhia ïa ki jingdawa jong ngi. Kumba ka paw, ïa ki jingdawa jong ngi ym shym la ïakren, lehse na ka jingbym kheiñ snep jong ka Sorkar,” u la ong.
Ki san tylli ki jingdawa kiba ka HNLC ka la tyrwa hakhmat ka Sorkar ki long ban weng noh ïa ka jingkheiñ beaiñ ïa ka Seng. Ïa ka HNLC la kheiñ kum ka seng be-aiñ hapoh ka sub-section (1) jong ka Section 3 jong ka Unlawful Activities (Prevention) Act, 1967.
U la bynrap, “ngi la tyrwa ban weng lut ïa baroh ki Case pyrshah ïa ki nongïalam bad ïa ki dkhot jong ngi ha ki Ingkashari kiba rit bad ha ki Ingkashari kiba heh ha baroh kawei ka jylla, khamtam eh ïa ki Case kiba ïadei hapoh rilum Khasi bad Jaiñtia. Ka jingweng noh ïa baroh ki mukotduma kan pynshngaiñ ïa ka jingïakren,” bad bynrap, “ka long kaba kongsan ban plie ïa ka lynti kaba shngaiñ na ka bynta ki nongïalam bahakhmat eh bad ki dkhot jong ka HNLC. Ban pynthikna ïa ka jingshngaiñ jong ngi kan wanrah ïa ka jingshaniah bad kan plie lad ruh ïa ngi ban ïashim bynta ha ka jingakren ïasuk.”
Ka tyllong khubor ka ïathuh ba ka HNLC ka la shim ïa kane ka rai hadien ba ki kashari ki la phah ïa ki shithi khot hajir ïa ki nongïalam ba hakhmat eh jong ka seng wat haba ka jingïakren ïasuk ka dang ïaid sakhmat.
Ha ka 30 tarik, Naiwieng, 2022, ka Sdpecial Court jong ka National Investigation Agency (NIA) ka la phah da ka shithi khot hajir ïa ki nongïalam ka HNLC ba kynthup ïa u Bah Bobby Marweiñ, Bah Marius Rynjah bad Bah Saiñkupar Nongtraw.
Ha kine ki notis la ong ba ka Kashari ka la ïoh pdiang ïa ka ujor ba ki nongïalam ka HNLC ki la leh lane la suba ba ki leh ïa ki kam be-aiñ hapoh ki kyndon jong ka Section 120B/435/436 jong ka IPC pule lang bad ka section 3/5 jong ka Explosive Substances Act 1908 bad Section 10(B) (ii)/13(I) jong ka UA (P) Act 1967.
La bthah ïa kine ki lai ngut ba kin leit mih hakhmat ka kashari jong ka NIA ha ka 4 tarik, Kyllalyngkot, 2023, katkum ka jingbtha jong ka Kashari.
Hynrei ha ka 3tarik, Nailur, 2023 ka HNLC sa shisien ka la pyrshah hadien ba ka Kashari jong u Judicial Magistrate First Class, Shillong ha u Jylliew, 2023 ka la khot hajir ïa u General Secretary Bah Saiñkupar Nongtraw wat hapdeng ka jingïakren ïasuk kaba dang ïaid shakhmat.
Ha kaba ïadei bad kane, ka seng ka la dawa ïa ka Sorkar ba ka dei ban weng lut ïa baroh ki mukotduma ba la pynngat ïa ki nongïalam bad ban ai mardor ïa ka jingmap ei hynrei lym kumta ka seng kam banse ban weng noh ïa ka jingïakren ïasuk.