Shillong, K’Lyngkot 07 : Ka jingbym lah jong ka tnad Public Health Engineering (PHE) ban ïoh jingbit na ka Hima Mawphlang ban tei ïa ka Pumping Station ha ka jaka kaba don markhnap bad ka wah Umïew ka la nang pynslem shuh shuh ban pyndep ïa ka Greater Shillong Water Supply Scheme Phase-III nalor ba ka la slem lypa.
“Ka jingeh kam dei satia ïa ka jinglut hynrei ka daw kadei na ka Hima Mawphlang (kaba haduh mynta kam pat ai satia ïa ka jingbit sha ka tnad ban tei ïa ka pumping station),” ong u Myntri ka tnad PHE, u Marcuise N Marak.
U Myntri u la ïathuh ruh ba ïa kane ka kam ki la shimkhia bha da ka sorkar jylla bad kumta mynta ki ap ïa ka rai jong ka Hima Mawphlang. Nalorkata u ong ruh ban pyndep ïa kane ka bynta kaba sah jong ka Phase-III, ka sah beit tad haduh ba kin da ïoh ïa ka jingbit na ka Hima.
Shuh shuh u la ong ruh ba ka Hima Mawphlang kam pat ai satia ïaka jingbit na ka bynta ban shim jaka watla ka sorkar lyngba ka kynhun myntri kala rai ban thung kam haduh 22 ngut.
“Kat kaba ki dawa, ka sorkar ka la dep ban mynjur,” u la ong.
Nalorkata, u ong ba ka sorkar ka donkam jaka hynrei katei ka kam ka sahteng bad ka Hima Mawphlang lym kumta, baroh ka kam ka la ïaid beit ban pyndep noh ïa ka Phase III jong ka GSWSS.
“Ka jingai jingbit na ka Hima ka donkam na ka bynta ban tei i ka pumping station ban tan ïa ka um na wah Umïew sha ka jaka pynlang um bad nangne pat sha ka treatment plant.”
Dang shen ka tnad ka la pan sa 66 klur tyngka na ka bynta ban pyndep ïa ka GSWSS Phase-III.
Ka dor trei na ka bynta kane ka projek ruh ka la nang kiew na ka daw ka jingbym lah ban pyndep naduh u snem 2008. La kumno kumno kumba 300 klur la mang na ka bynta ban pyndep ïa katei ka projek.
