Col CK Nayudu Trophy: Khur 6 wicket u Manish, khyrwit spah ron u Kevin ïa ka Meghalaya ban lamkhmat ïa ka Sikkim

Shillong, Kyllalyngkot 08: Ka kynhun ïalehkai kriket jong ka Meghalaya kam shym la pyndem ïalade ha ka innings tied ba nyngkong da kaba tam kput ron ïa ka Sikkim ha ka sngi ïakhun ba ar jong ka U-23 men’s Col CK Nayudu Trophy hynne ka Sngi.
Haduh 29 wicket kiba la shah pynhap ha kine ki ar sngi ba ladep, ha kaba ka Meghalaya ka la shah pynhap noh tang hadien 113 ha ka inning tied ba nyngkong hadien ba ka kynhun liang pyrshah ka la jop ïa ka toss ha Rangpo, Sikkim hynne ka Sngi.
Hadien kane, ka Sikkim ka la shah pynkut da tang 91 ron hap lut ki wicket shuwa ba ka Meghalaya kan khyrwit haduh 370/9 ha ka inning tied kaba ar, kaba la pynlong ïa ka kynhun ban lamkhmat ïa ka jingïakhun da 392 ron.
Ka jingseisoh ki rangïalehkai ka la kham noh sha ki nongkawangbol ha ka inning kaba nyngkong naba baroh arliang kim shym da lah ban kamai ron.
Hynrei watla kata ruh, na ka liang jong u Abhishek Kumar u la ïoh ban khur wicket mar ïa sdang. Ma u lem bad u Manish Sharma ki la khylliap ïa ka jingïakhun da kaba ïasam ïa ki 10 ngut ki wicket jong ka Sikkim- u Manish u la khur 6/40 na ki 18 over katba u Abhishek u la khur 4/31 naki 10.4.
Haba phai sha ka inning kaba ar jong ka Meghalaya, ka kynhun ka la lah ban sdang da kaba ïalehkai bha khamtam na ki player ba mih nyngkong u Mrinal Das bad u Nishanta Chakraborty.
Baroh arngut ki la ïoh ban kyntiew ïa ka ron ïa ka kynhun da kaba kamai mar san phew sha neng. U Mrinal u la tied 54 naki 45 bol (11x4s) katba u Nishanta (59 naki 101, 10x4s) shuwa ba ka jinglong paralok kine aengut kan shah pynkut.
Bad ka jingïakhun ka la nang shongshit hadien ba la mih u kapten ka kynhun, u Kevin, u ba la khyriwt 137 na ki 172 bol kiba kynthup ïa 19 tylli ki four bad kawei ka six.
Katba u PM Santhosh u la ïarap da kaba kamai 33, u Aryan Borah (14 not out) lem bad u Abhishek (11 not out) kiba la sah haduh kaba kut khlem da shah pynhap.