Kitbok ka RBDSA ïaki rangïalehkai ka District shuwa ban leit shim bynta sha ka Meghalaya Games ha Tura
Nongpoh, KyllaLyngkot 08: Ka Ri-Bhoi District Sports Association RBDSA mynta ka sngi kala ai ka jingkitbok kitrwiang ïaki rang bad thei ïalehkai phutbol jong ka District ha shuwa ba kin leit shim bynta sha ka Meghalaya Games 2024 ka ban long ha Tura.
Ha katei ka sngi la pynshngaiñ da ka jingdonlang u Bah Mathew Makdoh uwei naki riew rangbah ka them Ri-Bhoi ba dei ruh u ophisar bala shongthaid ka DRDA, Bah RB Shadap President ka RBDSA, Bah GS Shadap General Secretary ryngkat ki official jong ka RBDSA ryngkat ki rang bad thei ïalehkai phutbol U-18 jong ka District.
Naka liang ki nongïalam ka RBDSA kila ioh ruh ban sneng ban kraw ïaki rang bad thei ïalehkai ha katei ka sngi ba katei ka jingleit jong ki kam dei ba kin leit sngewbha lane shangkai hynrei ba kin long ki khynnah kiba tip ïaka akor ka burom khamtam ba kin pynleit jingmut kum ki nongïalehkai haka jingïalehkai kaba ki thmu ban leit.
U Bah Mathew Makdoh kum uwei naki kongsan bad riew rangbah ha katei ka sngi u la ïoh ban bet ïaki kyntien ksiar kyntien rupa naka bynta ki khun samla ki ban leit mihkhmat sha ka Meghalaya Game, ban sneng ban kraw ha shwa ba kin mih napoh ka district ryngkat ka jingkyntu nongleit ïashim bynta sha Meghalaya Games ba ki dei barabor ban long ki ba tip ïaka burom ka akor la kadei haka ktien ka thylliej ne ka riam ka beit, u la ong ruh ba ki jingpynshoi ki lah ban wan ha ki ba bun rukom hynrei kum ki samla ki dei ban long skhem ha la ka jong ka tynrai bad ban pyni ruh ïaki kam kiba bha sha kiwei pat.
Shuh shuh u bah Mathew u la ai khublei ruh ïaka sorkar jylla ba la kam khmat u Conrad Sangma kum u Chief Minister halor ka jingshimkhia ban pynlong biang ïa kane ka lympung kaba heh tam hapoh ka jylla kaba long ruh kum kawei naka jingailad ïaki khun samla ba kin ioh ban pyni ïaki sap ki phong jong ki haki jinglehkai bapher bapher.
Naka liang ka RBDSA kala pyntip ruh ba ki thei ïalehkai phutbol kin mih lashai ka sngi katba ki nongïalehkai Athletic kin mih haka 13 tarik Kylla Lyngkot ban leit sha Tura.