Mynta yn ai jinghikai ban ïada lada khynñiuh jumai ha West Khasi Hills, kyntu ïatreilang u DC

Nongstoiñ, Risaw 11: U Deputy Commissioner cum Chairman (DDMA) West Khasi Hills District, Nongstoiñ, u la pyntip paidbah ba ka Meghalaya State Disaster Management Authority, kan pynlong ïa ka State Level Mock Exercise ha ka 12 tarik U Risaw 2023 naduh ka por 9 baje mynstep ha baroh ki Distrik jong ka Jylla Meghalaya.
Kane ka Mock Exercise kan long kum shi bynta na ka jingpynkynmaw ïa ka jingkhih u Jumai bah ha u snem 1897, bad yn ïashim bynta da ka ki nongtrei sorkar jong ka District, ki Police, Fire and Emergency Services, Hospitals, ki Skul, ki Kolej, ki dkhot jong ki Shnong ki thaw, ki Volunteer na ki kynhun kiba pher bapher kum ka Bharat Scouts and Guides, NCC, NSS, Aapda Mitra Volunteers, bad kiwei kiwei.
Ban pyni ïa kane ka drill la shaniah ha ki ba la shemphang bha halor kane ka bynta kiban pyni ha ki kato katne ki jaka jong ka thaiñ Nongstoiñ bad ha ki Hospital. Shuwa ban sdang ïa kane ka drill, kan don ka jingpynpah siren na ka ophis U Deputy Commissioner, Nongstoiñ kum ka dak ban pyni ba U Jumai u la khie.
Hapoh West Khasi Hills District, ki jaka ki ban shah ktah kum ka dak jong kane ka Mock Drill ki long ha Office: DC’s Office, West Khasi Hills, Nongstoiñ, Shnong Pyndengrei, Mawkhmahwir, Trends Shopping Mall, New Nongstoiñ, NRL Pump, New Nongstoiñ, St. Peters Higher Secondary School, Pyndengrei, Civil Hospital, Nongstoiñ bad jaka twa khyndew ha NH-44E jong ka Shnong Pyngdengrei.
Ki jingdonkam na ka bynta katei ka drill kum ka Incident Command Post Medical Aid Post, Staging Area, Relief Camp, Base, Camp, bad kiwei, la thaw hapoh St. Peters Higher Secondary School, Pyndengrei.
La kyntu ïa ki paidbah ba kim dei ban sheptieng ne kulmar halor katei ka Mock Drill, hynrei ban ïatreilang bad ki jingpynbeit jong ki bor distrik, khnang ban lait na kino kino ki jingdheng kali ne pynthut ïa ka ïaid ka ieng ha ki lynti ki syngkieng.