Shillong, Risaw 12: Kawei ka longkmie kaba na ka Shnong Nongshken, kaba kyrteng ka Kong Sahitina Ïawim, ka la ïathuh ba ha myn Sngi U Blei, katba ka dang leit donkam ha kawei ka ïing, hamar ba poi ha ka lad ban leit sha Hat thymmai bad sha Nongshknen, la don kumba san ngut ei ei ki briew kiba ka ithuh bad kynnoh ba ki la shongshit kyiad bad kren ïa ka da ki kyntien ba khlem akor.
Ka Kong ka la ïathuh ba haba ka la mai ïa ki ba ki kren khlem akor, ki la sait ksan ba ki khlem kren bad pyrshang ban ktah kti pynban ïa ka. Ha katei ka por ka la leit lang bad uwei u rangbah u Bah Holdmark Ïawram bad kine ki briew ki la shoh la dat pynban ïa u ruh. Hadien kane, kata ka jingïania ïamai ka la shu kut noh kumto bad kane ka longkmie ruh ka la ïathuh ba ka la leit noh sha kata ka ïing ba ka mut leit donkam. Kane ka la jia ha ka por 5 baje ei ei janmiet bad la don ruh kiba ïoh ring video ïa kane ka jingjia.
Hynrei ynda la dap 7 baje mynmiet, ka Kong Sahitina, kala ïathuh ba kine ki briew ki la wan biang sha ïing jong ka bad pynroi ïa kaei kaba la jia ha ka por janmiet. Ha katei ka por la ïamih bun ki paidbah, tangba ym shym la lah ban tem ïa kane ka jingjia.
Ha kajuh hi ka miet, ka Kong Sahitina, ka la ïathuh ba ka la leit ujor ïa kine ki briew sha ki Pulit bad kine ruh ki la wan lang sha thanad ha Pynursla. Hynrei ki Pulit ki la pyllait noh ïa ki ha ka sngi kaba bud.
Kane ka longkmie, ka la ong ba ki Pulit ki la kyntu ban ïasuk noh shi ïing shnong ki shi thaw, hynrei na la liang jong ka, kam treh namar ka kynnoh ba kine ki briew ki don ka jingthmu kaba sniew ïa ka bad ka kwah ba ki Pulit kin leh ei ei halor kine ki briew.
