Shillong, Naitung 14: Hadien ba la ïoh jingpynbna ïa ka tarik ban pynlong ïa ka lympung lehkai ’48th Sub Junior National Basketball Championship na ka BFI ka ban sa pynlong ha Rajiv Gandhi Stadium, Puducherry ïa kaba la pynkhreh ban sdang naduh ka 3 tarik haduh ka 9 tarik u Nailar 2023, na ka liang jong ka Players Selection Committee jong ka Meghalaya Basketball Association kan sa pynlong ïa ka prokram jied khynnah ïalehkai (Selection Trial) ki ban sa mihkhmat ïa ka jylla sha katei ka rynsan ïalehkai Championship, kata ha baroh thup jong ki kynthei bad shynrang.
Ha kaba ïadei bad ka jingjied ïa ki khynnah napoh Garo Hills District la dep ban pynlong ïa kane ka prokram jied khynnah lehkai naduh hynne ka Sngi Thohdieng (14 tarik) kaba la pynlong ha Tura ha Christian Girls Higher Secondary School naduh ka por 1.00 baje ka nohphaisngi haduh 5.00 baje janmiet.
Katba na ka bynta ki khynnah ïalehkai kiba na Khasi Hills Districts, Jaintia Hills District bad napoh Ribhoi District ka Players Selection Committee kan pynlong ïa kane ka prokram mynta ka sngi Saitjaiñ bad kan long ha Shillong. Na ka bynta ki khynnah shynrang ïa ka jingjied la pynkhreh ban pynlong ha Shillong College katba na ka bynta ki kynthei yn pynlong ha St. Mary’s Higher Secondary School bad ka por kan long naduh 8 baje mynstep ha baroh ar ki jaka.
ïa ka prokram jied khynnang ïalehkai ba khadduh yn pynlong ha ka 17 tarik ha Shillong na ka thup jong kito ki khynnah kiba la shah jied ha ka prokram jied ba nyngkong kiba kynthuplang ïa baroh ki District. Katba ka jingkilanmet (Training Session) na ka bynta kito ki khynnah kiba la dep ban shah jied kan sdang naduh ka 18 tarik haduh 29 tarik mynta u Naitung 2023 ha Shillong. Bad kane ka long katkum ka kyrwoh kaba la pyllait da u General Secretary ka MBA, Bah Donald Steven Wahlang.
