Da ka lympung ïa kura yn pynlong ka Ri-Bhoi Boxing Association ban kyntiew ïaki samla ïakura ka jylla

Nongpoh, Naitung 14: Ka Ri-Bhoi Boxing Association haka jingïatreilang bad ka Meghalaya Boxing Association kala shim ïaka sienjam ban pynlong da ka lympung ïakura bala tip kum ka BFI East Zone Elite Men’s Boxing Championship 2023, da ka jingangnud ban sei madan bad kyntiew ïaki samla ïakura ka jylla.
Ïa katei ka lympung la rai ban pynlong naduh ka 17 haduh 19 tarik Nailar 2023 bad kane ka dei ruh ka sien ba nyngkong ba ka Ri-Bhoi Boxing Association kan pynlong kum katei ka lympung hapoh ka district bad ha kane ka lympung kumba 4 tylli ki jylla kin wan ban shimbynta ba kynthup naduh ka jylla Assam, West Bengal, Sikkim bad Meghalaya.
Haba kren ha kane ka sngi, naka liang ki nongïalam jong ka Ri-Bhoi Boxing Association bad kumjuh ruh ka Meghalaya Boxing Association kila pynpaw ba kane ka dei ka kabu ksiar naka bynta ki khun samla jong ka jylla ban shim bynta ha kane ka lympung, ban aireng pyrshah ïa ki rang ïakura na kiwei kiwei ki jylla.
Ha kane ka sngi la sakhi da ka jingdon lang u bah Cornelius Kharhunai president RBBA, kong Mercia Dohling secratary RBBA, u samla Dennis Marweiñ Assistant Secretary RBBA, U bah Larry Kharpran Joint Secretary Boxing Federation of India, u samla Dondor Marweiñ secretary MBA lem bad ki dkhot jong ka Ri Bhoi Boxing Association bad ka Meghalaya Boxing Association.