Jowai, Naitung 14: Ka lympung ïalehkai 3rd U Adelbert Laloo Memorial Trophy jong ka kyrdan 3rd Division Football Tournament 2023, ba la pynïaid da ka West Jaiñtia District Sports Association (WJDSA) kaba la long hynne ka sngi Thohdieng ha madan lehkai Kiang Nangbah Stadium, Dongmihsngi Jowai, la ïoh ban sakhi ïa lai tylli ki kynhun ba khur namjop katba kawei ka jingïakhun ka la jam sha kaba kut da kaba ïakhaid.
Haba phai sha ka jingïakhun kaba nyngkong ki rangïalehkai jong ka Mookyrdup kila lah ban pynjemkhnap da kaba thep kput haduh 5-0 kol ïa ka Sohmynting Dongneiñ ban khur ïa ka namjop, bad ïa ki kol na ka bynta ka Mookyrdup la thep da u Missile Bareh haka minit ba 13, kawei ka kol ka kum thep bakla ha ka minit ba 34, katba na ka liang jong u Dennis Passah u la ïoh ban thep haduh ar kol ïa kaba u la thep ha ka minit ba 37 & 39 bad ïa ka kol kaba khadduh ka la wan na u Nidaiar Kamar haka minit ba 68.
Haba phai pat sha ka jingïakhun kaba ar, hapdeng ka Umshangiar pyrshah ïa ka Pateinki Sabah. ka jingïalehkai ka la ïakhaid haduh kaba kut jong ka minit lehkai khlem don mano mano ba thep, kaba la pynlong ïa kane ka jingïakhun ban ïakhaid da 0-0 kol.
Hadien katei ka jingïalehkai kaba ïakhaid la bud sa ka jingïakhun hapdeng ka Mupliang pyrshah ïa ka Khliehmyntdu Neinchnong, bad ha kane ka jingïalehkai ka Mupliang ka la ïoh ban kheit ïa u soh ka jingjop da kaba pynliem 3-2 kol ïaka Khliehmyntdu Neinchnong.
ïa ka namtam ha kane ka jingïalehkai la khur da u Byforcestar Dhar u ba la ïarap ban thep ar kol kynthup ruh ïa ka kol kaba pynthikna ïa ka kynhun ban khur ïa ka namjop kiba u la thep ha ka minit ba 37& 70+2, bad na u Kermi Dkhar haka minit ba 56. Katba ïa ki kol na ka bynta ka Khliehmyntdu Neinchnong la thep baroh ar da u Fivestarson Shylla haka minit ba 45 & 70+4.
Katba haba phai sha ka jingïakhun kaba khadduh, hapdeng ka Royalpole Mihmyntdu pyrshah ïa ka Samaro, ka jingïakhun ka la jam sha kaba kut da ka Royalpole Mihmyntdu kaba la jop haduh 4-1 kol, u Pynshailang Shullet u la ïoh ban thep haduh ar kol na ka bynta ka kynhun haka minit ba 2 & 6, u Leirangki Papang haka mninit ba 12 bad u Bankerlang Shylla ha ka minit ba 19. Ïa ka shikol na ka Samaro la thep da u Deibor Bareh ha ka minit ba 51.
