Wan ba nyngkong ki thei ka Mawlai SC na ka Group-B, ka Laitkor SC na ka Group A

Shillong, Naitung 14: Ki thei ka Mawlai SC bad ka Lumparing SC ki la ïoh ban pynpaw ïa ka sap kaba kyrpang ka jong ki ha ka jingïaknieh kyrdan ba nyngkong na ka thup jong ka Group B ha kaba baroh ar kynhun ki la ïoh ban khur mar shi point hadien ba ka jingïakhun ka la kut ha ka jingïakhaid da mar 3 kol ha ka jingïalehkai jong ka lympung Shillong Sports Association’s Women’s League 2023 ha Third Ground, Polo, hynne ka Sngi Thohdieng.
Haba phai pat sha ka jingïalehkai kaba nyngkong, hapdeng ki kynhun ba ïaknieh kyrdan ba nyngkong napoh ka Group A, ka jingïalehkai ka la jam sha kaba kut ha kaba ki thei ka Laitkor SC ki la jop suk da 3-1 ïa ka PFR Football Academy, kaba la pynthikna ïa kane ka kynhun ban bat ïa ka kyrdan ba hakhmat.
Baroh kine ki saw kynhun ki ladep ban pynthikna ban rung sha ka semifinal hadien ba ki la khur namjop ha baroh ki saw sien ki jingïakhun ba ladep na ka Group Stage. Bad kaba dangsah mynne ka long satang ka jingïaknieh kyrdan ba nyngkong na baroh ki thup.
Shuwa kane ka jingïalehkai, ka Laitkor ka la ïoh ban lamkhmat ïa ka PFR lyngba ka jingïapher kol (goal difference) da +35 to +28, katba ka Mawlai ka la lamkhmat ïa ka Lumparing da +32 to +23 ka jingïohthep bun kol. Kaba mut baroh ar, kata ka Laitkor bad ka Mawlai ki donkam tang ban pynïakhaid khnang ban ïai bat ïa ka kyrdan ba nyngkong na ka thup ka jong ki.
Na ka liang jong ka Mawlai kaba dei ka lahduh jong u snem ba ladep ka la lah banbat kyrdan ba nyngkong hynrei ka la mad ïa ka jingïalehkai kaba jwat ha ka Lumparing, kaba la ïoh ban lamkhmat shuwa ha ka minit ba 25 lyngba ka kol na ka Iaphishisha Marbaniang kaba la thep jlang kaba la pynlong ïa ka thei-apkol jong ka Mawlai ban shem jingeh ban ïada ïa ka bol.
Hynrei watla kata ruh, ka Mawlai ka la ïoh ban pynphai shuwa ban jam sha kaba kut jong ka kylla step lyngba ka free-kick kaba la shut da ka Baiarkynti Mylliemngap (33′) jlang shapoh kol.
Hadien ba la bteng ïa ka jingïalehkai ha ka kylla miet, la ïoh ban sakhi ba ki thei ka Mawlai ki la nang pynkhlaiñ shuh shuh ïa ki bynta ba shakhmat jong ki ban tehlakam ïa kane ka jintgïalehkai bad ha ka minit ba 41 ka la ïoh ban lamkhmat lyngba ka kol na ka Da-aijinsuk Basaiawmoit. Hynrei ka Chibasal Sangma ka la ïoh ban thep ïa ka kol kaba ar na ka bynta ka Lumparing SC bad ka jingïoh thep kol ka la ïaryngkat biang da mar 2-2.
Ka Mawlai, kaba la mad namrem tang ar sien ha ki ar samoi jong ka Women’s League, kam shym la hun satia ban ïakhaid ha kane ka jingïakhun bad ha ka minit ba 57 ka Marbarin Nongrum kaba la pynlong ïa Mawlai ban lamkhmat biang ïa kane ka jingïalehkai ha ka sien kaba ar.
Hynrei ka Lumparing SC kam shym la kynran dien na kane ka jingïalehkai kat bym pat kut ka por, kawei ka kabu kaba la ïoh da ka Marbaniang la shah kyntait ha ka thei apkol jong ka Mawlai ha ka minit ba 70, hynrei ka bol ka la tyllun biang sha madan, bad ki bak jong ka Mawlai ki la pyrshang katba lah ban ïada na ki jingma ba wan na ki player ka Lumparing. Hynrei ha ka jingïai pyrshang ka Catherine Kharkongor (70’+1) ka la shem ïa ka lad ban pynïakhaid biang ïa ka jingïalehkai da mar 3-3 bad ïasam mar shi point.
Katba ha ka jingïalehkai kaba nyngkong, ka Laitkor ka la ïoh ban khur shalade ïa ka namjop kaba suk. Ha kane ka jingïalehkai, dei ka Tracy Rympei kaba la ïoh ban pynkhih ïa ka jar kaba nyngkong tang hadien hynriew minit ba la sdang ka jingïalehkai bad ka Iaraplang Nongrum ka la ïoh ban pynbud ïa ka kol kaba ar ha ka minit ba 13 bad kaba lai ha ka minit ba 23 kaba la pynlong ïa ka kynhun ban lamkhmat da 3 kol ha ka kylla step. Wat hadien ba ka PFR ka la shah lamkhmat haduh 3 kol ha ka kylla step hynrei ki la lah ban wanphai da kaba tyngeh ha ka kylla kaba ar bad da ka jingïa trei shitom jong ki player kane ka kynhun ka la ïoh ban thep ïa ka shi kol kaba la thep da ka Elviorika Sohklet (57′). Hynrei kam shym la lah ban ïarap ban pyllait ïa ka kynhun na ka namrem.
Ka Laitkor kan sa hap ban aireng ïa ka Lumparing ha ka semifinal, katba ka Mawlai pyrshah ïa ka PFR. Baroh kine ki jingïakhun yn pynlong ha ka 24 tarik mynta u bnai bad na ka liang jong ka SSA ka la thmu ban pynlong ïa kine ki jingïalehkai hapoh SSA Stadium – First Ground.