Mynshuwa ngi ong ki dei ki muid, hynrei mynta ngi kylla long ki sniang

-Diton John Wahlang, Lumshyiap Shanmari Golflink

0

Ka saiñ hima sima haki por kiba mynta kala kylla dur dashisha haka jylla jongngi bad wat haka Ri hi baroh kawei. Ym don shuh ka jingïakhun daka hok, Nga ïohi kumba ka hok kan sa shah bam duh noh haka thok ka shukor. Ka jingïatiplem parabriew kala jah noh bad ka spah ka kren briew haka imlang ka sahlang ka jongngi. Khamñiar eh ban shem ki briew ki ban ïeng naka bynta ka jingmyntoi kiwei pat ne ka jingmyntoi haka imlang ka sahlang, hynrei mynta ka khwan myntoi shimet daki buit sianti, daki ktien nangang ban pynbieij ïaki briew kiba kui lui ka jingmut jingpyrkhat bad ki bym lah ban ïohi jngai lada ki shah pyngngop ruh.
Ka jaidbynriew jongngi kadei shisha ka jaidbynriew kaba shah pyngngop haki ktien nangang jong kiwei pat ki kynhun jadbynriew kiba stad bad shalak ban khring ïaki jongngi sha ka liang jong ki. Kane ym dei eh tang ki riewpaidbah kiba shah khring haki jingpynbiej ha kiwei pat, hynrei wat haduh ki nongïalam ki jongngi kiba u paidbah u la jied ba kin ïalam iaka jaidbynriew bad ban trei naka bynta ka bha ka miat jong ki khun ki hajar u paid ka Bri U Hynniewtrep lane ban nang kyntiew ïala ki jong khnang ba ka Jaidbynriew kan lait naki jingeh jingshitom jingshitom bad ba ka lawei kan long ka lawei kaba phyrnai ïaka pateng ka ban dang wan. Hynrei kine ki nongïalam jongngi naka bynta ka jingmyntoi ka jong ki shimet, ki kloi wat haduh ban lilam ïaka khyndew ka shyiap, ka spah ka phew bad ki jingdon jingem kum ka jaidbynriew kaba riewspah haki liang baroh. Ngam kdew kti ne kynthoh pyrshah eh iano iano ruh ki nongialam, hynrei ki paidbah kin bishar hi ïala ki nongialam kiba maki ki la jied.
Ka jingbakla ka jongngi kum ki paidbah ruh ban jied ïaki nongialam ne nongmihkhmat kalong, ba Ngim ju jied nongïalam da kaba pynshong nongrim bha, kiba kum kiei Ngin jied ki briew kiba lah shisha ban long kita ki nongbah khala ki ban tynrong lem ïaka khia ka shon bad ki jyrwit wat jongngi kum ka Jaidbynriew ka ïatyngkhuh na kawei ka por sha kawei pat ka por. Bunsien Ngi jied iaki nongïalam daka jingsngew(feeling), ki lah ban long ha kiba bun ki rukom – lah ban dei ba ki long ki briew kiba bha jinglong ne ki dei naka kajuh ka jait ka kynja, naka juh ka jingngeit ne dei u ba lah ban noh synñiang khambun bad kiwei kiwei pat ki jingsngew kiba pynlong ïangi ban jied iaki kum kita ki nongialam. Ban jied ïaki nongïalam, kam da long kaba donkam eh ban don ïa kine ki jingsngew, hynrei ki nongialam kidei ban long ki bastad kiba shemphang, kiba lah ban shim ïa kino kino rai ne ki sien jam kiba kum ki paidbah kin ioh jingmyntoi ym tang shikhyllipmat hynrei haduh ki pateng ban wan ruh. Ki nongialam kiba ïohi jngai lypa ïa kino ki jingeh ba kum ka jaidbynriew ka lah ban iakynduh hadien habud bad ban saiñdur lypa kino kino ki lad ki lynti ban lah ban ïada lypa shwa ba kita ki jingeh kin wan lap.
Ha kine ki sngi Ngi ïohi ba kum ka jaidbynriew, Ngi bakla palat ban jied iaki nongmihkhmat, khamtam eh lei haba la treikam tyngeh ka pisa kaba kiba bun ki pyndonkam ban shu thied ia man u wei pa u wei u/ka briew ban jied ïaki kum ki nongialam ne nongmihkhmat. Ynda la poi pat haka Dorbar ban ïatai, kita ki Nongiam ne ki nongmihkhmat kim nang ban iatai ne iasaid naka bynta ka jingmyntoi jong ki nongshongshnong jong ka jylla ne khamtam jong ka jaidbynriew. Kum kine ki nongïalam kim da pyrwa ruh ban kit ban bah iaka khia ka shon jong ka imlang ka sah lang, namar maki ki ladep thied haka dor kaba rem ba kin shah jied kum ki nongialam ne nongmihkhmat, hadien ba kila shah jied, ka kam jongki ka long tang kumno ban khyllie ïa kaei kaba ki la pynlut bad ban ioh rut wat iaka sut kaba ki la seng. Kiwei ki jaitbynriew haba jied iaki nongialam ne nongmihkhmat kida pynshongnongrim, ki da jied da kiba kynsai bad kiba proh jabieng. Kane ka jingjied jongki ka wanrah ka jingmyntoi ïaka imlang ka sahlang ka jong bad ka jingkiew jong ka Jaidbynriew jongki hi ha babun ki liang.
Lada kano kano ka kynhun ne ka Ri, ki ïoh ki nongïalam kiba tbit bad kiba shemphang ne ki khrawpyrkhat ban saiñdur bha, ka mynta bad ka lashai jong kata ka kynhun ne ka Ri kan long ka khraw bad khlain haki liang baroh. Hynrei, lada ioh pat ki nongïalam kiba tlot haka sainpyrkhat ne ban iohi jngai, tang katta ka mynta bad lawei kan long kaba dum bad kaba tlot. Kata ka kynhun ne ka Ri ba don ki nongïalam ki bym biang kan shah knieh ne thombor haki kynhun ne ki Ri kiba khlainbor. Namar ka jingjop jong kano kano ka kynhun ne ka Ri kam shong haka jingbun paid, hynrei ka shong haka jingstad bad shemphang ki nongialam.
Ki ktien phira u mynbarim kiba ong, “Sian kum u bsein bad jemnud kum ka paro, ban shida than te ka ban ïap”, ki long shisha ki ktien sneng bad ki kyntien ban kyrsiew thiah iangi kum ki paid ka bri u Hynnniew Trep ban jied ki nongïalam kiba kynsai bad shemphang, kiba lah shisha ban ialam iaka jaidbynriew sha kliar jongki lum ka burom haka pyrthei shityllup.
Note: Nga thoh khnang ia kane ka article, ym ban kdew kti ne kynthoh ïano ïano, hynrei ka jingsngewthuh ban wanrah iaka jingkylla haka imlang ka sahlang, naka bynta ka lawei kaba phyrnai.

Leave A Reply

Your email address will not be published.