Shillong, Naiwieng 17 : U Myntri Rangbah ka Jylla, Conrad K Sangma ha ka sngi Palei u la sam da ka pisa kumjuh ruh da ki jingri sha ki paidbah ha Rangtari kaba hap ha Rangsakona Block, South West Garo Hills District.
Ha kane ka sngi u Myntri Rangbah u la sam haduh 7.93 lak tyngka ka pisa lyngba ka skim FOCUS+ Farmers’ Welfare Programme sha ki 793 tylli ki longïing nongrep.
Shuh shuh lyngba ka Rural Backyard Piggery Scheme, ‘PROGRESS’, la sam haduh 1600 tylli ki sniang khun (3 tylli ki sniang kynthei bad uwei u sniang shynrang) sha ki 400 ngut ki longïing nongrep.
Kumjuh, la sam ruh ïa ki syiar kuroiler sha ki 70 ngut ki nongioh jingmyntoi.
Haba kren ha kane ka sngi, u Myntri Rangbah u la ong, “Ngi sngewkmen ban ioh ban pynlong ïa kane ka prokram ban sam ïa ka pisa bad ki jingri na ka bynta ka bha ka miat ki nongrep, ki self help group bad ki Seng Samla ka South Garo Hills District. Ka sorkar jong ngi ka la trei shitom khlem sangeh ban kyntiew ïa ki nongrep ha kylleng ka Meghalaya. Ka jingthmu jong ngi ka long ban kyntiew arshah ïa ka jingioh da kaba pynioh shuh shuh ki lad ïa ki ïa ka kamai kajih ka ba neh.”
U la ong ruh ba mynta ki self help group ki la kiew ka jingdon sha ka 41,700 tylli ha u snem 2022 haba nujor bad u snem 2018 ki ba don tang 5814 tylli.
Shuh shuh u la ong ruh ba ha kine ki saw snem tam ki la lah ban pyntreikam shibun ki prokram bad ki mission na ka bynta ban wanrah ka jingkylla bad ki jingmyntoi na ka bynta ki nongrep.
