Shillong, Ïaiong 15 : Ki skul ba don ha East Khasi Hills District ha ka sngi Ba-ar ki la mynjur lang ban pdiang kham bun ki khynnah sha ka Class XI hadien ba ka jingpass ki khynnah ha ka Matrik/SSLC ka la kiew kynsah mynta u snem.
Ïa kane ka rai, la shim ha ka jingïalang kaba la lum da ki bor distrik jong ka East Khasi Hills ïa ki nongpynïaid jong kine ki skul kiba don ïa ka Plus Two lane ka HSSLC ha East Khasi Hills. Ha kane ka jingïalang ki bor distrik ki la kyrpad bad kyntu ïa kine ki skul ba kin pdiang noh kham bun ïa ki khynnah skul sha ka Class XI na kaei kaba ki ju shim barabor.
“Halor kane ka bynta, ki nongpynïaid jong ki skul bapher bapher ki la kyntiew shuh ïa ka jingpdiang ïa ki khynnah bad ïa kane la buh ruh ha ka website jong ka distrik kaba long – (https://eastkhasihills.gov.in),” ong ka Deputy Commissioner ha ka kyrwoh.
La ïathuh ruh ba kumba ju long barabor, ka jingdon ki khynnah ha ka HSSLC ha ka jylla ka long 51,000 ngut hynrei mynta u snem pat ka jingdon ki khynnah kiba pass ha ka SSLC ka la kot sha ka 55,473 ngut.
