Mynjur ki Regional Committee ka WKH – Kamrup ban leit jurip ïa ka Langpih Sector ha u Nailur
Aiti ha ki DC bad MDC ban jied ïa ki shnong
Shillong, Nailar 29 : Ka Regional Commmittee jong ka West Khasi Hills na Meghalaya bad Kamrup na Assam ha ka sngi Nyngkong ki la rai ban leit jurip lang ïa ki shnong bad ki jaka ba hap ha Langpih Sector hadien ba la kut ka Dorbar Synrai jong baroh ar tylli ki jylla.
Ïa katei ka rai, la shim hadien ka jingïalang kren pynbeit pud ha ka kylla kaba ar kaba long ha Nongbah Shillong na bynta ka Langpih Sector, West Khasi Hills hapoh ka jingïalam jong u Bah Paul Lyngdoh Myntri sorkar ka jylla kum u Chairman bad u Myntri ka tnad Forest jong ka sorkar Assam bad Chairman jong ka Regional Comittee Kamrup District nalor ki heh sorkar na baroh arliang.
Haba kren bad ki lad pathai khubor hadien ka jingïalang, u Bah Paul Lyngdoh u la pyntip ba ka jingïalang ka la lum thup ruh ïa ki jaka ha kaba ki don ki jingkynad ha kaba baroh arliang ki jylla ki kam trai.
“Kumta, la pynkhamti ha ki MDC na kito ki thain bad ruh ki Deputy Commissioner jong baroh ar tylli ki jylla ba kin pynkhreh ïa ka thup kyrteng jong ki shnong kiba ym don jingkynad ei ei ha ka ha ka jingïalang kaban sa long biang ha ka por ba ngin pynlong ka jingleit jurip lang,” u la ong.
Halor ka jingkylli, u Bah Paul u la ïathuh ruh ba ba kim lah ban kdew thik kaei ka shnong ba kin leit namar ka dang long syier ban ïathuh lypa bad ba kim kwah ban don kano kano ka jingjïa ha kaba ïoh don ki riew shimkabu ïa katei ka jingïakren kaba dang ïaid shakhmat mynta.
Da kaba kam ba katei ka jingïalang ka long kaba seisoh, Chairman ka Kamrup District, u Chandra Mohan Patowary u la ong ba baroh ar tylli ki jylla ki la dep ruh ban ïa kylliang ïa ki kot ki sla haba ïadei bad ka jingkam jong ki ïa ka Langpih Sector.
“Ka jingïakren ka long kaba seisoh. Kumta ngi khmih lynti ba hadien ba la kut ka Dorbar Synrai jong baroh ar tyli ki jylla ha u Nailur ngin sa leit jurip lang bad ngin sa pynbeit ïa ka tarik. Nga kyrmen ruh ba ngin sa lah ban pynkut ïa ka jingïakren bad ngin sa poi lang ha ka rai kaba khatduh jong ka jingïalang,” u la ong.
Na ka liang ka Meghalaya la donlang ruh ki ophisar kynthup ki heh pulit nangta u Bah Renikton Lyngdoh, MLA, Bah BG Momin MLA, Bah Methodius Dkhar MLA bad ruh u Bah Bajop Pyngrope MDC Rambrai nalor kiwei kiwei.