Shillong, Nailar 11 : Ka Kynhun Myntri ka Sorkar Jylla mynta ka sngi Thohdieng, ka la mynjur ban pyndam noh ïa ka Thermal Power Project ba 500 megawatt ba la ai pyntrei sha ka North Eastern Electric Power Corporation Limited (NEEPCO).
Haba ïakren bad ki lad pathai khubor hadien ka jingïalang, u Myntri ka Tnad pynmih Bording u AT Mondal ula ong ba ka NEEPCO ka la kyrpad ban pyndam noh ïa ka Memorandum of Understanding (MoU) ba la ïasoi bad ka Sorkar ban pyntrei ïa ka Thermal Power Project ha Ri-Lum Garo, kaba la ïasoi ha ka 17 tarik Lber, 2011.
Ula ong ba ka daw hi ka long ba mynta ka NEEPCO ka la shah ñiew kum ka tyllong pynmih ïa ka bording kaba khuid bad jyrngam bad namar kata, kam kwah ban pynbteng bad kane ka project.
“Ngi la dep ïakren bad u CMD ka NEEPCO, uba dei ruh u CMD ka NTPC” ong u Myntri haba pyntip “Ha ka jingïakren, kila kyrpad ban pyndam noh ïa kane ka project bad kumta, ka Kynhun Myntri ka la shim rai ban pyndap noh ïa ka Thermal Power Project ba la ai sha ka NEEPCO”.
