Shillong, Jylliew 28 : Ka Dorbar Mangtyngka jong ka KHasi Hills Autonomous District Council hynne ka sngi Balang ka la mynjur ïa ka Mangtyngka kaba duna 55,080 tyngka na ka bynta ka samoi treikam jong u snem 2023 – 2024.
Lah ban kdew hangne ba ka mangtyngka ban pynlut mynta u snem ka long 253.12 klur tyngka (253,12,59,690 tyngka) katba ka jingmang ban pynmih pat ka long 253,12,04,610 tyngka, ka jingmang tyngka kaba duna 55,080 tyngka.
Ha ka jingïatai halor ka Mangtyngka, u Nongïalam ka Liang Pyrshah u la kdew ba ki don bun ki kam pynroi kiba la pyntrei da ka Council la ka long naduh ki iew ki hat haduh ki jaka jngohkai pyrthei na ka bynta ban pynmih khajna ïa ka Council. Ha kajuh ka por u la kdew ruh ïa ka jingsahteng ban pyndep ïa kawei na ki projek jaka jngohkai pyrthei kaba don ha Jingkieng Kalong kaba la tei ha ka jinglut kaba la bun bha naduh ka samoi ba la dep.
Na ka liang u Bah Titos u la kyntu ruh ïa u Executive Member ba thymmai ka tnad Council Building ban shimkhia khnang ba katei ka projek kaba baroh ki khmih lynti kan dep noh.
Haba jubab halor kane, u CEM, Bah Pynïaid Sing Syiem u la kubur ba katei kadei ka projek kaba heh bha jong ka council kaba ïadei bad ka kam jngohkai pyrthei ha Jingkieng Kalong.
“Ïa kane la sdang ha ka samoi ba la dep bad mynta ka la ïaid shakhmat,” u la ong da kaba pynkynmaw ba ka jingtei ïa ka la pynsangeh shipor na ka daw ka mukotduma khamtam na ka National Green Tribunal,” u la ong.
Shuh shuh u ong ruh ba kane ka EC kan peit ruh ba ki projek jong ka Council kin ïoh ban pynmih khajna la ka long naduh ka jaka jngohkai ha Maraikaphon Sohra kumjuh katba ka Bishop Falls ha Mawlai kaba dang pyntrei nalor ki ïew ba ka don.
Na ka liang u CEM u la kular ruh ban peit ba ka jingai ïa ka building permission kan long kaba ïaid beit bad kham kloi namar katei ka tnad thymmai ym tang ba ka pynsuk ïa ki paidbah ban ïoh jingbit ban shna iing hynrei ka ïarap ruh ban kyntiew ïa ka jingïoh lum khajna ha ka Council.
