Bthah ka MP Tura ban leh da kaba tyngeh ïa ki kontraktor ba khlem pyndep ia ka skhim PMGSY
Williamnagar, Jylliew 28 : Ka MP ka Tura Parliamentary Constituency ka Agatha K Sangma ha ryngkat u MLA bad Myntri Sorkar Marcuise N Marak ki la lum ïa ka jingïalang shong bishar kam halor ka jingpyntreikam ïa ki skhim bapher bapher ka Sorkar Pdeng ha East Garo Hills mynta ka sngi Balang.
ïa kane ka jingïalang la pynlong hapoh ka jingpynïaid jong ka District Development Coordinaton and Monitoring Committee (DISHA) kaba la wan ïashim bynta da ki Heh Ophisar jong ki Tnad bapher bapher kynthup u Deputy Commissioner ka East Garo Hills.
Kawei na ki skhim ba la ïatai sani bha ha ka jingialang ka dei ka Pradhan Mantri Awas Yojana-Gramin (PMAY-G). Halor kane, u Marcuise ula pynpaw ïa ka mat ba ki don katto katne na ki nongïoh skhim ki la pynpaw ba ki kwah synniang pisa lem ban shna ïa ka surok ha la ki jong ki Shnong hynrei naba ki kyndon kim shah satia, la kyrpad ïa u BDO ba kin pynshai ïa kine ki nongïoh jingmyntoi.
Ha ka jingïakren la pynpaw ruh ba ki don haduh 67 tylli ki surok kiba ka jingjngai ka kot 234.911 Km ba la bei pisa lyngba ka Pradhan Mantri Gram Sadak Yojana (PMGSY) hapoh ka District.
Napdeng kine, la pyntip ba 40 tylli ki surok ki dei kiba la dep trei pyndep hynrei haduh 27 tylli ki dei kiba dang sahteng. Halor kane, ka MP ka la bthah ïa ka Tnad ba pyntreikam ïa ka PMGSY ba kan leh eiei pyrshah ïa ki kontraktor kiba khlem pyndep ïa ki project ba la bynshet ha ki kat kum ka por ba la buh.
Ha kae ka jingïalang, la shong bishar ruh halor ka jingpyntreikam ïa ka Jal Jeevan Mission (JJM) bad ka Swachh Bharat Mission jong ka Ministry of PHE, ka Meghalaya Health Sector Strengthening Project (MHSSP) bad ka Pradhan Mantru Bharatiya Jan Aushadhi Pariyojana (PM-BHIM) kiba hap hapoh ka Tnad ka Koit ka Khiah, ka Poshan Abhiyan kaba hap hapoh ka Integrated Child Development Services (ICDS), Pradhan Mantri Krishi Sinchai Yojana (PMKSY) jong ka Tnad Soil and Water Conservation bad kumjuh ruh ïa ka Antyodaya Anna Yojana (AAY) bad ka Public Distribution System (PDS) for Priority Household (PHH) jong ka Tnad Supply.