Shillong, K’lyngkot 11 : U Bah Kynjaimon Amse, u Nongïasaid Aiñ na East Jaintia Hills, ula mudui sha ka National Human Rights Council (NHRC) ba kan tuklar lem halor ka jingkynnoh bym lah ki shipai Border Security Force (BSF) ban ïada ïa ka jingim jong ki paid riewlum trai Jylla kiba shong ba sah ha ki thaiñ Khappud ka India-Bangladesh.
ïa kane ka jingujor la mudui hadien ka jingshah pyniap ki arngut ki nongshong shnong khappud ha ki riew runar ka Bangladesh dang ha kine ki khyndiat sngi ba la leit noh.
Uwei u rangbah ba kyrteng u Sylvanus Dhar ula shah pyniap dusmon ha palat 15-16 ngut ki nong Bangladesh katba u dang ap ïa ka bri kwai ha Balisar, Lumsokie, Umkiang, East Jaintia Hills myn ha ka 6 tarik Kyllalyngkot.
Lai bnai mynshwa, kawei ka longkmie ba kyrteng ka Priskila Suchiang kala shah pyniap ha Shnong Dona Skur ha ka 12 tarik Nailar jong u snem ba la dep.
Ha ka shithi ujor, u Bah Amse ula ong ba ha kine ki snem ba la leit, ka jingwan tuh ki riew runar na Bangladesh ka la jur bha hajan ki jingker sainar khappud, kaba la wanrah ïa ka jingduhnong kaba khraw ïa ki paidbah kiba rep kwai ha khappud ka India-Bangladesh.
Namar kane ka jingïai bteng ka jingwan tuh, ki riew paidbah kila hap ban sah ha ki khlaw ban ïada ïa la ki jong ki mar rep na ki nong Bangladesh kiba wan prong tuh ban leh ïa ki kam bymman.
Haba kynnoh ba ki BSF kim shym la lah satai ban khang ïa ka jingwan rung beaiñ ki nong Bangladesh sha India, u Bah Amse ula ong “Ki BSF ki la pulom ha ka ban pynthikna ïa ka jingshngaiñ ha ki jaka khappud ha shilynter ka thaiñ Umkiang bad Lamasaki, East Jaintia Hills. (Namar kata), ki BSF, kiba dei khmih ban wanrah jingsngaiñ ha khappud, ki dei ban ai jubab halor kane…”.
U Bah Amse ula ther tyngeh ruh ïa ki BSF halor ka jingpyni ba ki dang mon ban khmih ïa ka jingïaid ki kali hapoh ka National Highway-6 ha ka jaka ban khmih ïa ki jaka ba marjan ki khappud.
U Bah Amse ula ong ba ka jingshah pyniap ki arngut ki briew ha khappud India-Bangladesh kala wanrah ïa ka jingsyier ïa ki paidbah ha khappud namar ki nong Bangladesh ki lah ban rung da kaba suk sha ka Ri ban leh ïa ki kam tuh kam thiem bad ban pyniap briew.
Haba kyrpad ïa ka jingtuklar jong ka NHRC, u Bah Amse ula ong “Nga sngewthuh ba kam long kaba suk ban pahara bad tehlakam ïa ka jingrung tuh, nga shu kyrpad ban pynjur ïa ka jingïaid pahara bad ban buh ïa ki border post ha ki jaka ba i kongsan”.
