Ka jingkob ka BJP ban jop palat 400 seat ha Lok Sabha dei ba ïarap ka ECI, ED bad CBI kynnoh ka Cong
Shillong, K’lyngkot 11 : Ka Nongaiktien ka All India Congress Committee (AICC) Wing Commander (retd) ka Anuma Acharya ha ka Sngi Palei ka la kynnoh ba ka BJP ka la kob ban jop palat 400 seat ha ka elekshon Lok Sabha ban wan namar ki Tnad treikam ba laitluid kum ka Election Commission ka India (ECI), Enforcement Directorate (ED) bad ka Central Bureau of Investigation (CBI) ki la kylla long ki tnad bad ki dkhot treikam jong ka.
“Ka BJP kala kob namar ka ECI, ED, CBI ki la kylla long ki tnad ne dkhot treikam jong ka BJP” kynnoh ka Acharya haba kren sha ki lad pathai khubor.
Haba kynnoh ba baroh ki tnad treikam ba laitluid ki la shah ksih bad shah pynïaid ha ka BJP, ka Acharya ka la ong “Ka jingpyndonkam ïa ka ED, CBI, IT pyrshah ïa ka Liang Pyrshah bad ban weng be-aiñ ïa ki Sorkar bala jied da u paidbah ka la dei ka rukom jongka BJP”.
Haba kylli kaei ka sienjam ba ka Congress kan leh ha ka ban pyllait ïa kine ki tnad na ka jingshah pynïaid ha ka kam saiñ pyrthei, kane ka nongaiktien ka AICC kala ong “Ki paidbah ki dei ban kyndit bynriew, ki paidbah ki dei ban ïeng rasong bad kin sa lah ban jied ïa ka Sorkar ba synshar da u paidbah ïa u paidbah. Ynda la wan kane ka Sorkar paidbah, baroh kila long biang kumba ju long”.
Kane ka Heh AICC kala wan ha Shillong ban pynbna ïa ka Bharay Jodo Nyay Yatra ba ïalam da u President barim u Rahul Gandhi, ka ban sdang na Manipur. Kane ka yatra (rally) ba 66 sngi kan long haduh 6700 kilometer bad kan ïaid lyngba ki 110 tylli ki district hashuwa ban pynkut ïa ka ha Mumbai ha ka 30 tarik Lber.
Ka la ong ba ha ki 10 snem ka jingbym bishar/leh hok da ka Sorkar BJP kala ktah jur bha ïa ki paidbah, ïa ka riti synshar paidbah bad ïa ka riti synshar ka ri.
Halor ka jingkylli la kane ka yatra kan don jingktah ïa ka elekshon Lok Sabha ban wan, ka Acharya kala ong “Khlem pep kan don jingktah hynrei ngan ym kynthoh eiei la kan pynkylla sha ki vote, ngim tip hynrei dei ban don mano mano ki ban lamkhmat ha ka jingïakhun na ka bynta ka riti synshar paidbah, ka jingïakhun ban ïada ïa ka riti synshar ka ri, kaba la pyntroiñ da ka BJP.