Shillong, K’Lyngkot, 11: Namar ka jingwan iuhkjat jong ka President ka ri India sha nongbah Shillong ka tnat Pulit jong ka Jylla ka la kyrpad ïa ki paidbah ba kin kiar katba lah ban ïaid sha Mawngap bad ha ki katto katne ki bynta jong ka nongbah Shillong.
Ha u kyrwoh, u Superintendent of Police jong ka East Khasi Hills Bah Sylvester Nongtnger u la pyntip ba ka President jong ka ri India ka Droupadi Murmu kan sa wan jngoh ïa ka nongbah Shillong bad ïa ka Lawkyntang Mawphlang ha ka 16 tarik mynta u bnai.
“Namar ka jingïaid lynti jong ka President ka ri, kin don katto katne ki bynta hapoh ka nongbah Shillong ba ki kali kin hap ban sangeh shipor ka leit ka wan katba ka President ka dang ïaid lynti. Namarkata, la kyrpad ïa ki paidbah ba kin kiar katba lah ban ïaid sha Mawngap bad ha ki katto katne ki bynta jong ka Sor Shillong lait noh tang haba donkam eh,” u la ong.
U SP u la ong ruh ba yn sa pynsangeh shipor na ka bynta 30 minit ïa ki kali ha ka por ba la wan poi ka President ha ka 16 tarik mynta u bnai.
Ha kine ki kynta yn pyllait tang ïa ki kali Emergency Service ban ïaid lyngba, la bynrap u SP.
