Shillong, K’Lyngkot 11 : Ka Khasi Students’ Union (KSU) lyngba ka Employment Monitoring Cell ka la leit buh da ka dorkhas sha u Director (Corporate Affairs) jong ka MeECL halor ka jingslem na ka liang ka MeECL ban thung ïa ka kam Assistant Engineer.
Katkum ka kyrwoh la ong ba ïa kane ka post jong u Assistant Engineer (Electrical/Mechanical) ki la pyndep ïa ka eksamin ha ka 13 tarik Naitung, 2019 bad la pynmih ïa ka result ha 19 tarik u Nailar, 2019. La ïathuh ruh ba la jied haduh 24 ngut ban leh sa ïa ka personal interview ha 26 tarik u Nailur, 2019.
“Phewse shuwa kata ha u 22 tarik u Nailur 2019 ki la pynpep noh ïa kane ka interview bad la 4 snem tam kim shym la lah shuh ban pynurlong ïa kane ka kam,” ong ka kyrwoh.
La ïathuh ruh ba ka seng ha ka jingïakren bad ki bor pynïaid jong ka MeECL ka la ïoh jingtip ba ka MeECL kam shym la lah ban thung kam ïano ïano ruh naduh u snem 2020 namar bym don pisa ban siew tulop bad ïa ki post ba kyrkieh ba donkam la shu thung kontrak.
“Ka Seng lyngba kane ka kyrwoh ka kwah ban buh dak jingkylli ïa ka Sorkar jylla, khamtam eh ïa ka Power Department ba kaei ka sienjam ba ka la shim ban pynbeit ïa ki kynrum kynram ha MeECL bad kumba ka long mynta kaei ka lawei jong ka MeECL. Ka Seng ka dawa na ka Sorkar jylla ba kadei ban shimkhia halor ka thung kam thung jam ha ka MeECL bad kumjuh ruh ban pyllait ïa ka tulop jong ki nongtrei jong katei ka tnad,” bynrap biang ka kyrwoh na ka seng.
