Shillong, Kyllalyngkot 11: Ban pynthikna ba kan don ka jingshngaiñ bad ba ka Umiam Stage-I Dam kan treikam bha, u Myntri ka tnad Bording u Abu Taher Mondal, hynne ka sngi Palei, ula leit jurip ïa ka jingpyntreikam ïa ka Dam Rehabilitation and Improvement Project (DRIP) hapoh ka jingkieng Damsite.
ïa u Myntri la synran da u Sanjay Goyal uba long u Commissioner & Secretary ka sorkar jylla uba khmih ïa ka tnad Bording bad Chairman-cum-Managing Director ka MeECL, ryngkat bad u Bah Moonstar Shangpliang, Director Distribution bad i/c Director (Generation) lem bad kiwei kiwei ki heh ophisar jong ka Ri-Bhoi District.
Kane ka jingleit jurip ïa ka Umiam Stage-I Dam, khamtam ïa ki ar tylli ki jingkieng ka long ban peit ïa ka jingïaid ka kam ka jam jong ka DRIP bad ha kane ka jingjurip katei ka kynhun kala ïakren bad ïatai sani bad ki nongmihkhmat jongka M/S ITD Cementation India Ltd ban pynthikna ba ka jingpyntrei ka jongki ïa ka kam ka dei ban long katkum ki kyndon kiba la buh.
“Ka Umiam Stage-I Dam kam dei eh tang ka jingtei kaba dei da ki maw bad ka nar hynrei ka dei ka jingim kaba ai bording ïa ki ïing ki sem, ki karkhana bad ka jingïaid shaphrang jong ka jylla. Ka long kaba sngewtynnad ban ïohi ïaka jingtrei shitom jong baroh ha ka jingpyntreikam ïaka Dam Rehabilitation and Improvement Project (DRIP). Ka jingïatreilang hapdeng ka sorkar bad ki paralok na ki kompani bad ka jingtrei borbah hapoh madan ka long kaba dei ban ai ka jingïaroh. Nga ngeit skhem da ka jingïatrei lang ka jong ngi, ngin ym pynthikna tang ïa ka jingshngaiñ jong ka Dam hynrei kan long ruh ka jingplie lynti na ka bynta ka lawei bad ka jylla kaba pahuh pahai haka bording ha ki snem ban wan” ong u Mondal.
Kawei kaba la mih na kane ka jingleit jurip ka long ka jingshim ïa ka rai ban bujli noh ïa ka Roller Rocker Bearings, kaba la rim bha bad kaba long kongsan na ka bynta ban pynneh pynsah ïa ka jingkieng.
ïa katei ka bynta la bynshet ha ka ITD Cementation bad M/S Sanrachana Structural Strengthening Pvt. Ltd., ha kaba la ai ïa ka jingbthah ba ki dei ban ïatreilang bad ba kin bud ryntih ïa ka engineering standards bad ban pynthikna ban pynduna ïa ka jingdheng kali ha katei ka thaiñ.
U Mondal ula bthah ïa ki bor pynïaid district ba kin pynbun ïa ki briew ha shi lynter jong katei ka surok kiba hap hapoh ka East Khasi Hills Districts bad Ri-Bhoi District bad kane ka jingbthah ka long ban peit ba kan don ka jingïaid beit ïaid ryntih ki kali bad ban shim ïa ki lad jingïada bad ban lait na ka jingdheng kali.
