Shillong, Kyllalyngkot 11 : U Myntri ka tnad pule puthi ka jylla u Rakkam Sangma uba long ruh u Nongïalam ka seng National People’s Party (NPP), mynta ka sngi ula ong, ba ka seng Congress kan sah sa tang ha ka ‘Histori’ namar ki paidbah ki kwah ïa ka lawei bad ka mynta bad kim kwah ban vote shuh ïa ka.
Kane ka jingkren u Myntri bad MLA ka NPP ka la mih hadien ba u nongïalam ka Congress u Bah Vincent Pala ha ka sngi Baar, ula ong ba ka sorkar pdeng hapoh ka jingïalam ka seng Congress kala theh bun shah ïa ki kam pynroi ha ka jylla bad ka party ka la don bynta ha ka ba wanrah ïa ka NEHU, IIM Shillong, NIFT Shillong, NEIGRHIMS bad kiwei kiwei ki projek kam pynroi hapoh ka jylla.
U Rakkam Sangma haba ïakren bad ki nongthoh khubor, ula ong, kaei kaba ka Congress ka la leh ka dei kaba la dep mynshwa, mynta ka la don tang ha ka histori bad yn buh ïa katei tang ha ki kot.
“To ngin ïa buh ia kitei tang ha ki kot. Ki paidbah kim ju vote ïa ka histori, ki kwah ïa ka lawei bad ïa ka mynta”, ong u Rakkam.
Ula ong, ba ki paidbah khamtam ki samla ki dei ban jied ïa ka seng kaba kumno kin jied, ka seng aiu kaba lah ban trei bha bad ka seng kaba kumno kaba lah ban thaw ïa ki lad aikam aijam.
“Ki don ki khep ba kaei kaba don tang ha ki kot ki sla yn ym lah ban pynshisha ïa ka jinglarkam” ong u Rakkam ïa ka seng bad ki nongïalam ka Congress.
Ki paidbah kim ju ïakren shaphang kine kiei kiei baroh bad kaei kaba la jia mynshwa kan sah beit kum ka mynshwa.
“Kaei kaba u leh, kaei kaba ula leh ha ki por mynshwa. Ki nongthep vote mynta ki rai ïa ka jingdonkam jong kane ka por kaba mynta” la ong u Rakkam.
