Mih sa u para jongu “I Love You” ban leh kam pyntriem pynïap ïa u rangbah na Mynsngat

0

Shillong, Lber 22 : Hadien ka jingïap noh u I Love You Talang, mynta pat sa u Para trai jong u u Meban Talang, ula leh ïa ka kam ba pyntriem bad pynshongsyier ïa ki paidbah da kaba pynïap klep ïa uwei u rangbah uba dei na ka shnong Mynsngat, West Jaintia Hills.
ïa kane ka kam pynïap briew ba la leh da u Meban Talang bad u paralok jongu u Sambun Dkhar la lap hynne ka sngi hadien ka jingkem ki Pulit ïa u Meban bad u Sambun Dkhar, halor ka jingjah rngai une u rangbah na Mynsngat.
Kat kum ka khubor Pulit, u Meban Talang uba dei u para trai jong u I Love You Talang, hynne ka sngi ula ïalam ïa ki Pulit ka Nartiang Police Station sha ka jaka ba ma u bad arngut ki paralok jongu, ki la bret ïa ka metïap jong une u rangbah uba la tip kyrteng kum u Bah Pynkhreh Surong ba 29 snem ka rta. Kane ka jaka ka dei ka riat kaba don harud ka surok bah jong ka thaiñ Lamlyer hajan Mawryngkneng, East Khasi Hills.
Haba ïakren bad u para jong u bah Pynkhreh Surong, ula ïathuh ba u hynmen jong u, ula jah rngai naduh ka 10 tarik mynta u bnai ha ryngkat bad kawei ka kali Mahindro Bolero Pickup kaba dang thymmai hynrei naka liang ka ïing ka sem kam wad ïa u namar ki dang mut ba u don ha ïing ka kurim.
La ïathuh ba kane ka jingshah kem u Meban Talang, u Sambun dkhar bad u paralok jong ki, ka dei hadien ba la saphriang kane ka khubor hapoh ka shnong ba kine ki 3 ngut ki la tyrwa ban die ïa kawei ka kali thymmai.
Hadien ka jingsuba ba kane ka kali ka lah ban dei jong u bah Pynkhreh Surong, ki bahaïng hasem ki la ujor daka ejahar pyrshah ïa kine 3 ngut hapoh ka Nartiang Police Station haka 21 tarik mynta u bnai.
La ïathuh ba na ka liang ki Pulit tang mar syn ïoh kem ïa u Meban Talang, u Sambun Dkhar bad ïa u paralok jong ki, ki la pynlong ka jingtohkit bad hapdeng kane ka jingtohkit kine 3 ngut kila phla ba ki donkti ha kane ka kam pynïap briew.
La suba ba ïa kane ka kam sang ban pynïap ïa une u rangbah la lamkhmat da u Sambun Dkhar namar udei na kajuh ka shnong bad u tip ba une u rangbah u dang dep sei kali thymmai bad u don katto katne pisa haka por ba u wan kiew sha Shillong.
Haba ïadei bad kane, ki bahaïng u bah Pynkhreh Surong kila dawa sdien phasi ïa u Meban Talang bad ïa u Sambun Dkhar namar kine kidei ki snar pynïap briew bad nongtuh kali bad ki dei ruh kiba ju donkti lang bad u I Love You Talang ha ki kam sniew.
“Naka liang ka ïing ka sem ka dawa ban phasi syndon ïa kine kiba donkti namar kine ki dei ki briew kiba ju donkti lang bad u I Love You Talang ha ki kam pynïap briew, kam tuh kali bad kiwei kiwei de ki kam bymman bad khamtam u Meban bad u Sambun kidei kiba la shah kem teng” la ïathuh u para jong u bah Pynkhreh Surong.
La ïathuh ba kine ki 3 ngut ki pynïap ïa u bah Pynkhreh Surong da ka ba ksih da u tyllai na ryndang bad ki la tap da ka blanket ïa ka met hadien ba ki la bret ïaka met sha riat.
La ïathuh ruh ba haduh mynta, ym pat lah ban lap ïa ka kali bad ïa ka song pisa.

Leave A Reply

Your email address will not be published.