Dei ki Shnong bym don ha ka Report 2011 kiba pyrshah ïa ka MoU pynbeit pud : CM

Shillong, Lber 22: U Myntri Rangbah, u Conrad Sangma, u la ong ba ka Report ba la phah da ka Meghalaya sha ka Assam ha ka snem 2011 ka long ka jingïarap na ka bynta ka jingïapynbeit pud ha u snem 2021 lane da ka sorkar MDA I, hynrei ka la wanrah ruh ki jingeh namar ki shnong kiba pyrshah ïa ka MoU kidei ki shong kiba ym shym la kynthup satia ha kane ka Report.
Haba jubab ïa ka jingïatai kaba sani bha ba la ïashim bynta da u Bah Charles Marngar, MLA Mawhati, Bah Mayralborn Syiem, MLA Nongpoh bad u Bah Ardent Basaïawmoit, MLA Nongkrem, u Conrad u la ai nuksa ba ha ki bynta khappud jong ka West Khasi Hills bad Assam ha ka Report jong ka snem 2011, la kynthup kumba 22 tylli ki Shnong kiba don jingïakajia, hynrei ynda leit sha kine ki thaiñ, ki la mih kumba tylli ki Shnong ban pynpaw ba ma ki ruh ki kwah ban don beit ha Meghalaya.
“Kane ka dei ka jingeh kaba khraw tam, namar ngim lah ban pynrung shuh ïa kine ki Shnong ban ïakren pynbeit, namar ka jingïakren la pynshong nongrim beit na ka Report jong ka snem 2011 kaba la kynthup tang 22 tylli ki Shnong”, la ong u Conrad.
Nangta kawei pat ka jingeh kaba u Myntri Rangbah u la pynpaw halor ka jingdkoh ka Report 2011, ka long ba ha ka thaiñ Malangsalbari- Darbari ha ka jingthoh la pynpaw ba kidei ki jaka ba hap ha Meghalaya, hynrei ha ka map pat la pynpaw ba ka hap sha Assam. Hynrei u Conrad u la ong ba um kynnoh ïa ki sorkar kiba ladep namar kine ki jingbakla, namar ha ka jingtreikam ym lah lait na ki jingbakla kiba kum kine.
“Ngam kwah ban kynnoh ïano ïano, hynrei nga shu pyni tang ban ïasngewthuhlang ki dkhot ka ïingdorbar”, la ong u Conrad.
Nangta u la ong ruh ha ka por ba shim ïa ka historical fact lane ka jinglong ki briew bad ki jaka katkum ka histori, u Conrad u la ong ba haba la leit lang da ka Meghalaya bad Assam sha ki jaka ba don jingïakajia, haba ki paidbah ki pynpaw ba ki kwah ban don ha Meghalaya, wat lada ki jaka ki hap sha Assam, hynrei namar ba ki paidbah ki kwah ban don ha Meghalaya, la pdiang ïa kata bad kajuh ruh ka long na ka bynta ka Assam.
Ha kajuh ka por u Myntri Rangbah u la ong ba ki paidbah kidei ban sngewthuh ba ka Meghalaya bad ka Assam kidei hapoh India ym dei ki artylli ki ri bad hap ban pdiang ïa ka jingïapynbeit na ka bynta ka shongsuk shongsaiñ.
Haba ban ba ka sorkar kan ïaid beit shakhmat ba ka jingïapynbeit pud ha ka bynta kaba nyngkong, u la ong lypa ruh ba ha ka jingïapynbeit pud ha ka bynta kaba ar kin don beit ki jingbymhun na baroh ki liang, hynrei hap ïaid beit pat na ka bynta ka jingshongsuk shongsaiñ ki paidbah ha khappud.
Na ka liang u Bah Charles Marngarhaba wanrah ïa kane ka Special Motion, u la pynpaw ka jingsngewkhia halor ka MoU pynbeit pud kaba nyngkong, ha kaba la don bun ki jaka jong ka Meghalaya kiba la shah pynhap noh sha Assam, kum ka Maikhuli ha kaba ka Pung dohkha kaba long ka jingmyntoi kaba khraw ïa ki paidbah ka la hap noh sha Assam. Nalor ka Maikhuli u Bah Charles u la ong ba ki don bun kiwei pat ki jaka kiba ki paidbah kim mon ban leit sha Assam ki la shah pynngat sha Assam. U la kyntu ruh ïa ka sorkar ba kan da leh sani bha na ka bynta ka jingpynbeit pud ha ka bynta kaba ar bad ban kynthup ruh ïa ki nongmihkhmat na ki jaka ba don ha khappud khnang ban ïoh ban ïakren sani bha.
U Bah Ardent Basaïawmoit, u la kdew ïa ka jingtreikam ka sorkar naduh u 2010 ha kaba ka la trei shitom ban lumthup ïa ki jingthoh bad ki map jong ki jaka kiba don ka jingïakajia pud bad ka Assam ha kaba ha ka snem 2011 la phah ïa kane ka jinglum thup sha ka Assam. Haba sot na kane ka report, u MLA Nongkrem u la ong ba ki jingthoh bad ki kot ki sla ki kdew shai ba ki jaka kidei kiba hap ha ki Hima Khasi naduh ka por ba ka ri India kam pat ïoh jinglaitluid bad khambun na kine ki jaka kiba don ha West Khasi Hills kidei kiba hap ha ka Hima Rambari kkum ka Tarabari, ka Gisang bad kiwei kiwei. Nangta kiba ha Ribhoi ruh ki kot ki sla ki pyni shai ba ki hap ha Khasi Hills ki kot ki sla ki pyni ba ki hap ha Nongpoh Police Station naduh ki snem kiba mynshuwa.
U la ong ruh ba kane ka jingïapynbeit pud, ka Assam ka ïoh 18.19 Sq KM katba ka Meghalaya pat ka ïoh 18.06 Sq KM.