Kynduh mawsiang ka Sorkar ban pynïaid ïa ki Bus kit Khynnah skul ha Shillong
Tang 15 tylli ki skul kiba pyntip ban ïatreilang
Shillong, Lber 22: Ka jingthmu jong ka sorkar jylla ban pynïaid da ki Bus ban kit ïa ki khynnah skul khamtam ïa ki skul kiba don sha Laitumkhrah bad Dhanketi.
U Myntri Rangbah, u Conrad Sangma, haba jubab ïa ka jingkylli ba la wanrah da u Bah Charles Pyngrope, u MLA ka Nongthymmai u la ong ba ki don ki skul kiba la pynpaw ka jingeh ban pynïaid ïa kine ki Bus namar ba ka kam jong ki ka long ban hikai bad ban peit beit ïa ki khynnah skul. Ki la pynpaw ka jingeh ruh mano ban siew tulop ne ban lut na ka bynta ki nongpynïaid jong kine ki Bus.
“Ngi la pynlong kumba shispah sien ki jingïakynduh bad ki skul, ki Pulit bad ki kmie ki kpa halor kane ka bynta, hynrei ka paw hi ba ka don ka jingeh”, la ong u Myntri Rangbah, da kaba bynrap ruh ba ki la don haduh palat hajar tylli ki sorbe na ka bynta kane.
Haba batai kham bniah halor kane ka jingthmu, u Conrad u la ong ba ki don haduh kumba 27,000 ngut ki khynnah skul ba leit skul sha ki thaiñ Laitumkhrah bad kumba 60% na kine kidei kiba leit da ki kali la jong ne kali shimet.
Namar kane ka jingkynran dien jong ki skul, u Myntri Rangbah u la ïathuh ba ka sorkar ka la thaw da ki lad ki lynti ban wad noh da ki kynja seng ne ki Society ki ban pynïaid ïa kine ki Bus, ha kaba ha ki sngi shuti ne ki kynta bym long skul, kine ki Bus ki lah ban leit kamai ne ban kit ïa ki nongtrei sorkar.
Shuh shuh u Conrad u la ïathuh ba ha kine ki Bus la pyndait haduh san tylli ki CCTV na ka bynta ka jingshngaiñ jong ki khynnah skul.
Watlada ki don ki skul kiba kren thlia, hynrei u Myntri Rangbah u la ong pat ba ka jingkhang pat kam khang ïa ki ba kin pan ban pynïaid hadien lada ka jingpynïaid da ki Society ka long kaba i beit bad ryntuh ne long ka jingmyntoi.
Hadien u Myntri Rangbah u la ïathuh ba ki don kumba 15 tylli ki skul kiba la pynpaw ba ki lah ban ïatreilang na ka bynta ban pynkit ïa ki khynnah skul.
Na ka liang u Bah Charles u la pyni ïa ka nuksa jong ka skul Bajoria kaba la pynïaid da ki Bus ban kit ïa ki khynnah skul bad u la kyntu ïa ka sorkar ba kan lah ban shim nuksan na kane ka skul. Ïa kane ka jingai jingmut jong u MLAka TMC la pdiang da u Myntri Rangbah.
Lah ban kdew hangne ba ka sorkar ka thmu ban pynïaid 30 tylli ki Bus ban pynkit ïa ki Khynnah skul bad la mang ruh ban pyllut 11.30 Klur tyngka ha kaba mynta la pynlut 17 lak tyngka katkum ka jingïathuh u Myntri Rangbah.