Nongstoiñ, Jylliew 5: Kum ka jingïasnohkti lang bad ki paitbah ha shityllup ka pyrthei ha ka sngi pynneh pynsah ïa ka mei mariang, ki nonghikai bad ki khynnah jong ka Tynghor Secondary School ha ryngkat ka jingïatreilang bad ka Seng Samla Shnong ki la pynlong ïa ka jingrakhe ba kyrpang.
Ha shuwa ban sdang ïa ka jingthung ïa ki tynrai dieng, la pynlong ïa ka jingïalang ba lyngkot ha phyllaw jong ka skul ha kaba la pynïaid da u samla Pynshai Joel Dkhar ha kaba la ïadonlang da u Hedamaster jong katei ka skul u babu P.Lyngdoh, u bah K.P.Pangñiang MLA barim ka Rambrai Jyrngam u ba dei ruh u chairman ka Managing Committee jong ka skul.
La ïoh ïa ka jingkren na u babu O.Sohmad ha kaba u la pynsngewthuh ïa ki khynnah skul bad ki samla jong ka shnong, ba ka mariang ka dei ka kmie jong ki briew ha ka pyrthei shityllup bad lada ki briew kim sangeh noh ban pynjot pathar ïa ka mariang, khlem artatien tang hadien katto katne snem ka thma bah kaba shyrkhei kan khie bad kata ka dei ka thma ïaknieh um.
U la ong ruh ba ka jingpynjot pathar ïa ka mariang da kaba khlong dusmon ïa ka khyndew, pom pathar ïa ki dieng ki siej, pynduh ïa ki khlaw ki btap ka dei ka daw ba kongsan ba ka jingshit jong ka pyrthei ka nang kiew man la u snem. U la pyni nuksa ruh ba ka jingrang tyrkhong mynta u snem ka dei ka nuksa jong ka jingkyrduh um ha ki snem ban wan.
U bah Pangñiang haba ai jingkren u la ong ba ban thung ïa ki dieng ym dei ban shu thung tang ban dep rukom, hynrei dei ban don ka jingkitkhlieh namar nangne shakhmat ka jingkyrduh um kan long kaba shyrkhei haduh katta katta. Nalor kata u la ong ba ha kiwei ki ri ka pyrthei kum ha ki ri Arab ka um ka kham rem dor ban ïa ka petrol namar ki dei ki ri ki bym don khlaw.
U la ong ruh ba ka jingthung ïa ki dieng kwai bad ki dieng khlaw ka pynneh pynsah ïa ka jingjyrngam bad u la kyntu ruh ïa ki khynnah skul bad ki samla shnong, ba kin shim ka jingkitkhleh na ka bynta ban pynjyrngam pat sa shisien ïa ka mariang kaba la synlen, khnang ba ki paitbah nongshong shnong kin lait na ka ‘nemsniew jong ka jingkyrduh um.
Nalor kata u la ong ruh ba ka por ka la dei ba ki bor sorkar kin shimkhia ïa kane ka mat bad lada ka sngew dei kan thung noh da ki pulit ïada mariang kiba kynsai. Namar, ban shu pyrkhing tang da ki dorbar shnong kin ym lah ban leh ei ei, hynrei lada ki bor sorkar kin shimkhia kan long ka jingmyntoi kaba khraw.
U la ong ba ka shnong Tynghor ka dei ruh ka Headquarter jong ka hima Jyrngam Sirdarship bad ka jingpynneh pynsah bad pynjyrngam ïa ka mariang sa shisien pat ka dei ban sdang na kane ka shnong.
