Kyrshan ka Congress Nongstoiñ ïa ka jingdawa pynbeit Reservation Policy

0

Nongstoiñ, Jylliew 5: Ka Block Congress Committee ha ka sngi saitjaiñ ka la shong ïa ka jingïalang kyrpang ban ïa phylliew jingmut ha kaba ïadei bad ki kam ki jam jong ka seng ba kumno yn pyntyllun nangne shakhmat. Kyrpang ruh la ïakren halor ka Reservation Policy ha kaba u MLA Bah Gabriel Wahlang u la pynpaw ba dei ban kyrshan namar ka dei ka ishu jong ka jaidbynriew.
Ïa katei ka jingïalang paidbah la pynlong ha Bishop Hall Nongstoiñ bad baroh ki nongkitkam jong ka seng Congress kiba na ka Nongstoiñ konstitwensi, ki la wan ban ïathir jingmut lang ha katei ka sngi. Hadien ka jingïakren kaba la neh kumba katto katne por ka seng Congress ka la shim ruh ïa ka rai ban ai jingkyrshan ïa kaei kaba u MLA ka Nongstoiñ u la kren haba ïadei bad ka Reservation Policy.
Ha katei ka jingïalang paidbah nalor u bah Gabriel Wahlang MDC/MLA ka Nongstoiñ konstitwensi, la donlang ruh u bah Golden Nonglong bad kiwei kiwei ki riew pawkhmat jong ka seng bad ki paidbah jong ka thaiñ.
Ha katei ka sngi nalor katei ka mat ba kongsan, ka seng ka la ong ruh ba kan shim ïa ka sienjam ban leit ïakynduh ïa ka kong Ampareen Lyngdoh, kaba dei ka myntri ka koit ka khiah ban pan jingshai balei la kit noh ïa ki tiar na MCH Hospital Nongstoiñ sha Mawkywat, namar ïa kitei ki tiar la mang kyrpang na ka bynta ka Maternity & Child Hospital kaba don hapoh ka shnong Upper New Nongstoiñ.
U bah Ïoanis Lyngkhoi Vice president ka Nongstoiñ Block Congress Committee bad u samla Fender Nonglait President West Khasi Hills District Youth Congress, ki la pynpaw ha ka jingïakren bad ki nongthoh khubor hadien katei ka jingïalang, ba shen kin sa leit ban dawa jingshai na ka myntri ba ka dei ban pynshai, namar kumba long mynta ki paidbah ki sah ha ka umdum ban pyrkhat.

Leave A Reply

Your email address will not be published.