Ka jingleh bymsuidñiew ïa ka mariang ka wanrah ka jingkylla ha ki bun rukom: DC

0

Mawkyrwat, Jylliew 05: La rakhe mynta ka sngi ïa ka World Environment Day halor ka phang, “Beat Plastic Pollution”, ha Mini Secretariat, Mawklyrwat ha kaba u bah T. Lyngwa, IAS, Deputy Commissioner ka South West Khasi Hills District, Mawkyrwat u la long u kongsan. Ïa kane ka prokram la pynlong da ka ophis jong u Divisional Forest Officer Social Forestry & Territorial Division, West & South West Khasi Hills ryngkat ka jingïatreilang bad ka District Administration, South West Khasi Hills District.
Haba kren ha kane ka jingïalang u bah T. Lyngwa, IAS, Deputy Commissioner ka South West Khasi Hills District, Mawkyrwat u la ong ba kane ka sngi ka pynkynmaw ïa ngi ïa ka jingkordor jong ka mei mariang bad ïa ka kamram kaba ki kum ki nongshong shnong ngi dei ban leh ha kaba ïa dei bad ka jingtyngkai bad ka jingpynneh pynsah ïa ka mariang, u la ong ruh ba kumba 400 million ton ka plastik la shna ha ka shi snem ha baroh kawei ka pyrthei bha kaba ka jingpyndonkam ïa ka plastik ka la nang jur na ka por sha ka por, u la ban jur halor ka jingdonkam ban kyntu ïa ki paid nongshong shnong ban pynduna ïa ka jingpyndonkam ïa ki plastik da kaba pyndonkam biang da ki juh ki plastik khnang ban lait na ka jingpynjulor bad ka jingpynjaboh ïa ka mei mariang u la pynpaw ruh ïa ka jingbynniaw halor ka jingkiew jong ki nongpyndonkam plastik da kaba kdew bad pyni ba lada kim lah ban leh ei ei na kaba khanglad ïa ka jingpynjulor ïa ka mariang kan poi ka por ha kaba kin hap ban shu thied ïa ka lyer na ka bynta ban ring mynsiem ha ka dor kaba rem.
“Ka jingleh bymsuidñiew jong u briew ha kaba pynjulor ïa ka mei mariang bad ki sawdong sawkun ka wanrah ïa ka jingkylla ha ka suiñbneng bad ki jingjia kiba khyllah kum ka jingshlei um, jingtwa ki lum ki wah bad kiwei kiwei kiba pynduh noh ïa ka jingitynnad ka mariang bad ka jingduh kaba khraw”, ong u bah T. Lyngwa. Namarkata, u la wer la khot ïa baroh ban ïasnohkti lang ha kaba pynkhie im biang ïa ka mei mariang da kaba kin phikir, kin sumar bad ban ïaleh ban thung dieng khamtam ha kito ki jaka kiba la pynjulor.
U bah J.D. Kharwanlang, Superintendent of Police, South West Khasi Hills District u la kren halor ka jingdonkam ban pynneh pynsah ïa ka mariang da kaba pyndonkam da ki tiar kat kum ka juk kaba mynta kum ha kaba tih dewïong, tih maw, tih shyiap bad kiwei kiwei ban lait na ka jingtwa khyndew bad ha kajuh ka por u khot u ïa baroh ban thung bun ki dieng kiba lah ban ai jingim bad ban kiar na kaba thang ïa ki phlang, ki lum ki wah ban lait na ka jingpynjulor ïa ka mariang bad ki dei barobor ban kynmaw ba kine ki tiar kiba ki pyndonkam khlem da phikir kin pynïap ïa ngi shisien ka sngi.
Ka kong S. Kharsohnoh, District School Educational Officer (DSEO) bad In-charge Sub Divisional School Educational Officer (SDSEO), South West Khasi Hills District ka la pynkynmaw ïa ka kamram bad ka bynta kaba ki dei ban leh kum ki nongsynshar jong ka mariang ha kaba ki dei ban sumar, ban phikir bad ban ïada ban lait na ka jingpynjulor, ka jingpynjaboh ïa ka mariang kaba wanrah ïa ka jingkylla ha ka jinglang jong ka suiñbneng. Namarkata, ka la ban jur halor ka jingdonkam ban tyngkai ïa ka um, ka bording bad kiwei kiwei na ka bynta ban pynneh.
La pynbud da ka jingthung dieng ha phyllaw jong ka Mini Secretariat bad ha Children’s Park kaba don ha Laitlawsang, Mawkyrwat bad ban pynshai shuh shuh ha ki khynnah skul shaphang ha jingkordor jong ka jingpynneh pynsah ïa ka mei mariang u bah G.H. Chyrmang, MFS, Divisional Forest Officer, Social Forestry & Territorial Division, West & South West Khasi Hills District u la ïoh ruh ban pyni ïa ki ar tylli ki phlim kiba u la buh kyrteng ka “Only one Earth” bad “Beat Plastic Pollution”.
U bah J.S. Chyrmang, D.F.O, Nongstoiñ & Mawkyrwat u la ïalam ïa ka Pledge Taking Ceremony. Kham hashwa, u bah M.J. Kharbuddon, ACF, Mawkyrwat u la pynïaid ïa ka jingïalang katba u bah H. Kharmutee, R.F.O, Nongstoiñ u la pyllait da ki kyntien khublei.
Ha kajuh hi ka sngi na ka liang ka Meghalaya Basin Management Agency (MBMA) ha ryngkat ka jingïatreilang bad ka Nativity Higher Secondary School, Mawkyrwat bad Nativity Secondary School, Mawkyrwat ki la ïoh ban rakhe ïa kane ka sngi ba kyrpang ha kaba u bah T. Lyngwa, IAS, Deputy Commissioner, South West Khasi Hills District, Mawkyrwat u la long u konsan.
Ïa ka jingïalang la pynïaid da u bah Kegitar Lyngdoh, Deputy Manager Monitoring & Evaluator (DM-M&E), ka jingkren pdiang na u Principal jong ka Nativity Higher Secondary School, Mawkyrwat, ka jingrwai kyrpang na ki khynnah skul, ka jingkren lyngkot na u bah Riban Dkhar, SM-Training Specialist bad ka jingkren khublei na ka Niwancy Bareh, Deputy Manager, Environment Management.Hadien ka jingïalang u kongsan, ki nonghikai, ki ophisar bad ki khynnah skul ki la ïoh ban ïa thung ïa ki symbai dieng ha ki rud ki kiar jong ka skul.

Leave A Reply

Your email address will not be published.