Shillong, Ïaiong 11 : Ki lai tylli ki seng na Mawlai ba kynthup naduh ka Seng samla Mawlai Umjaiur, nangta ka Seng kynthei Mawlai Umjaiur kumjuh ka Seng Mawlai Labour Welfare Association Umjaiur, ha ka sngi Nyngkong ki la mih paidbah ban pynkhuid ïa ki jaboh jabaiñ kiba satah ha wah Umshing.
Hadien ba la dep ban pynkhuid ïa ka, na ka liang ka Seng Samla ka kyntu ïa baroh ki nongshong shnong ka Mawlai kumjuh ki Dorbar Shnong kiba hap ha shi lynter ba ïaid lynti ka wah Umshing ban shim khia lem ban pynneh pynsah ïa ka jingkhuid jingsuba jong ka.
“Mynnor kane ka wah ka dei ka ba ngi ju sum ju sait bad kadei ka wah kaba khuid ban saitjaiñ bad khwai dohkha dohthli ne tong doh. Hynrei, ha kine ki por ba mynta ki nongshongshnong kim ñiewkor shuh ïa ka haduh ba ka pynlong ïa kane ka wah ban kylla jakhlia,” ong ka kyrwoh ba la phah da u Bah Maiustar Mylliemngap, President Seng samla Mawlai Umjaiur.
Shuh shuh na ka seng ka pynpaw ba kim kwah satia ban ïohi ba ka wah Umshing kan kylla kum ka wah Umkhrah tang na ka jingleh bymsuidñiew ki nongshong shnong.
“Ka seng ka maham jur ïa ki nongshong shnong ba kin ym bret ïa ki jaboh ne ban pyn jakhlia ïa kane ka wah namar kane ka ktah ïa ka khuid ka suba bad ka koit ka khiah jongki para nongshong shnong. Ka Seng ka la ai khublei ruh ïa u BDO ka Mawlai Block, Bah PT Passah kumjuh ïa u MDC ka thaiñ Bah Teibor Pathaw kiba don ka mynsiem ban ïarap katba ki lah na ka bynta ban pyntyllun ïa ka kam ban pynkhuid ïa katei ka wah.
Da kaba ai khublei ïa baroh ki kynhun bad ki seng kiba la mih shakhmat ban snohkti lang ha katei ka sngi, ka seng ka ong ruh ba ki don ka jingkyrmen ba da ka jingïatreilang kin lah ban ban pynkylla dur ïa katei ka wah.
