Shillong, Risaw 07: U MLA barim ka Ranikor u Bah Martin M Danggo ha ka sngi Nyngkong u la resaiñ noh na ka Bharatiya Janata Party (BJP).
Ha ka shithi sha u President ka BJP u Rikman G Momin, na ka liang u MLA barim u la ong ba u phah ïa katei ka shithi resaiñ noh jong u na ka jinglong dkhot jong ka Bharatiya Janata Party na ki daw shimet.
Lah ban kdew hangne ba u Bah Danggo u la don bad ka NPP ha shwa ba un leit ban pynïasoh bad ka BJP ha shwa ka elekshon MLA 2023 hynrei ha katei ka elekshon u la shah rem noh ha u kyrtong ka UDP Bah Pius Marwein.
U Bah Danggo kum u MLA ba la jop haduh san sien kum u MLA u la mih noh na ka Congress ha u snem 2018 bad leit pynïasoh sha ka NPP hadien ba ka sorkar MDA-1 ka la kyntiew kyrdan noh ïa ka Ranikor Block sha ka kyrdan Civil Sub-Division. Hynrei ha ka elekshon shiteng samoi kaba long ha utei u snem hi, u la shah rem noh ha u Bah Pius Marwein.
