Mih kyrteng 2436 tylli ki shnong na ki 21 Block ha Meghalaya ban thied sboh na MeCOFeD

0

Shillong, K’lyngkot, 22: Ka Sorkar India ka la pynmih ïa ka kyrteng jong ki 2436 tylli ki shnong na ki 21 tylli ki Block jong ka Jylla ban thied ïa ka sboh dawai (Chemical Fertilizers) na ka Meghalaya Cooperative Marketing Limited (MECOFED Ltd).
U kyrwoh ba la phah da u President jong ka Khasi Jaiñtia Farmers Association (KJFA) Comfrey Rajee u la ong, “kumba lah ban sngewthuh ym pat pynthikna la ka dor jong ka sboh dawai Urea (Nitrogen), Single Super Sulphate (SSP), Di-Ammonium Phosphate (DAP), ka Moriate of Phosphate (MoP) bad Indofil (Biochemical Pesticide) kan long ha ka dor iew ne dor subsidy. Hynrei ka Sorkar Meghalaya ka la pynsangeh ïa ka subsidy jong kine ha u snem 2014.”
Katkum ka jingïathuh jong ka Director jong ka Agriculture ka Kong Silda Kharsati ha u Bah Comfree Rajee bad katto katne ki nongkitkam jong ka Khasi-Jaiñtia Farmers’ Association (KJFA), la ong ba ki don 57 tylli ki shnong na Mylliem Block, 103 shnong na Mawphlang Block, 156 shnong na Pynursla Block, 65 shnong na Mawryngkneng, 94 shnong na Laitkroh Block, 24 shnong na Mawpat Block, 132 shnong na Bhoirymbong, 164 shnong na Umsning Block, 112 shnong na Jirang Block, 160 shnong na Mairang Block, 104 shnong na Mawthadraishan Block, 250 shnong na Nongstoiñ Block, 158 shnong na Mawkyrwat Block, 126 shnong na Thadlaskeiñ Block, 99 shnong na Laskeiñ Block, 97 shnong na Amlarem Block, 124 shnong na Betasing Block,142 shnong na Damalgre Block, 181 shnong na Zikzak Block, 40 shnong na Demdema Block bad 16 shnong na Tikrikilla Block.
Kumba shu kdew hangne kumba 46 na ka 100 ki nongtrei bapher bapher ha ka ri ki dei ki nongrep bad ha Meghalaya kumba 80 na ka 100 ki dei ki nongrep.
Ka sorkar India ka la pyllait ar tylli ki skhim kawei ka dei ka Prime Minister Kisan Samridhhi Kendra (PMKSKY) lane ki dukan die sboh bakyrpang kiba na ri jingshakri bapher bapher ha kawei ka jaka bakyrpang.
Kaba ar ka dei ka Pradhan Mantri Bharatya Jan Urvark Pariyojana (PMBJUP) ba la tip kum “Kawei ka Ri kawei ka Sboh” ka ban ka plie paidbah ïa kawei ka sboh ba la tip Kyrteng “BHARAT” kaba long kawei ka jait sboh dawai kaba kynthup lang baroh ki jait sboh bakongsan ban bha ki jait jingthung bapher bapher.
Ki 600 tylli ki PMKSKY kin treikam kum kawei ka dukan ki ban don lut baroh ki jingdonkam ki nongrep. Kine kin don lut ha baroh ki distrik khnang ba ki nongrep kin ïoh lut ïa ki sboh ba ki donkam bad ki tiar rep ba donkam bad ki Common Service Centre (CSC).

Leave A Reply

Your email address will not be published.