Maham ka SDDF ïa ki seng saiñhima ban shim kabu elekshon da ka jingdawa distrik ïa ka Sohra
Shillong, K’lyngkot, 22: Ka Sohra District Demand Forum (SDDF) ha ka sngi U Blei ka la maham ïa kino kino ki seng saiñhima kiba pyrshang ban shim kabu ha ki rynsan ïalap elekshon ïa ka jingdawa ban kyntiew kyrdan noh ïa ka Sohra Civil Sub-division sha ka distrik bapura.
“Ngi kyntu ruh ïa ki seng saiñhima sima ba kim dei ban ïalam bakla ïa u paidbah jong ka thaiñ Sohra halor kane ka kam tang ban ïoh jingmyntoi election,” ong u kyrwoh ba la phah da u Chairman ka Forum u Bah Atiar Syiemlieh.
“Lyngba kane ka jingpathai khubor ka SDDF ka pynpaw ïa ka jingsngewdiaw kaba khraw halor ka jingpynslem jong ka Sorkar MDA hapoh ka jingïalam u Myntri Rangbah u Conrad K. Sangma ban pynbna (notify) ïa ka jingkyntiew kyrdan ïa ka Sohra Civil Sub-Division sha ka distrik ba pura,” ong u kyrwoh.
Haba pynkynmaw ïa ki jingbuddien jong ka Forum, ka SDDF ha u kyrwoh ka la ong, “ki nongïalam jong nka SDDF ki ladep ïakynduh ïa u Myntri Rangbah ha ka ka 26 tarik, Risaw, 2022 ha kaba u la kular ban khmih bniah ïa kane ka jingdawa jong ki paidbah ka thaiñ Sohra baroh kawei. Ha ka taiew kaba nyngkong jong u Kyllalyngkot, 2023 u Myntri Rangbah u la phah khubor lyngba u dkhot jong ka Foroum u Bah Alan West Kharkongor ba u kwah ban ïakynduh ïa ki dkhot jong ka Forum ha ka 5 tarik, Kyllalyngkot, 2023 ban pynbna noh ïa ka Sohra Civil Sub-Division kum ka Distrik ba pura. Ka Forum da ka jingkmen wut wut ka la lum ïa ki khlieh nongsynshar bad ki Rangbah Shnong jong ka thaiñ ban pyntip ïa kane ka khubor bakmen. Phewse ha ka jingïakynduh kaba la long ha ka 5 tarik Kyllalyngkot, 2023 ha Sohra Circuit House, u Myntri Rangbah u la pynjew slew ïa ki dkhot jong ka Forum bad ïa ki khlieh nongsynshar da kaba u shu kular ban sa ai distrik bad ba ka Sohra kan dei ka Headquarter. Lano kata kan urlong, um shym la jubab ne kren thikna.”
“Kane ka jingkular jong u Myntri Rangbah ha ka jingïalang kam shym ïahab satia katkum ka jingphah khubor jong u sha ka Forum ban pynbna distrik noh ïa ka Sohra Civil Sub-Division. Ka shu long pynban tang ka jingkular lehse tang namar ba ka Assembly Election ka la jan,” la ong u kyrwoh.
“Namarba ki la don ki khubor ka khlieng ka tyngab kiba ïalam bakla, kumta ka SDDF ka pynpaw shai kdar lyngba kane ka pathai khubor ba haduh mynta ka Sohra Civil Sub-Division kam pat kiew kyrdan District satia. Ka SDDF kan ïai bteng ïa kane ka jingdawa haduh ba kan da urlong,” la bynrap u kyrwoh.