Mih ki paidbah da ki hajar ban sngap ïa ka jingïalap elekshon u kyrtong Congress ha Mairang

Shillong, Rymphang 17 : Da ki hajar ngut ki paidbah nongshong shnong jong ka Mairang constituency ki la poi sha ka jingïalang ïalap elekshon jong u kyrtong ka Congress, Bah Batskhem Ryntathiang kaba long ha ka sngi Thohdieng ha jaka pynieng kali ha Pyndemumiong.
Haba kren ha katei ka jingïalang, u Bah Batskhem u la ong ba ka jingwan jong ki sha katei ka jingïalang ka long ba ki kwah ïa ka jingkylla. U ong ruh ban im ka Ri bad ka Jaidbynriew ym dei ban kynnoh tang ïa u paidbah hynrei nyngkong ïa ki nongïalam naduh ka rukom pyrkhat ka mynsiem bad ka dohnud.
“Lada ki nongïalam ki pynbiej ïa phi tang ha ka por elekshon ka jingkyrmen jongphi kan shu sepei noh,” u la ong.
Nalorkata, u ong ruh ba ka jingjop jong uno uno u nongïalam kadei beit tang ka jinglah ban ai ïa ka jingsynshar kaba khlem shah liang ïano ïano ruh.
Ha kane ka sngi, u la ong ruh ba kum ka party kin ym lah satia ban pynlong ïa ki rally namar kim kotbor bad kumta kin ym pynlong wat ïa ki jingkhawai lane ai kali namar kim kwah ban leh ïa kaba kiwei ki leh hynrei kin ieng beit ha ka nongrim.