Shillong, Rymphang 17: Hynnin ka sngi u Amit Shah, Myntri korbar ri jong ka ri India, ha ka jingïalap elekshon ha Tura u la kynnoh ba ka Meghalaya kadei ka jylla bamsap tam ha ri India.
Hynrei ka khubor kaba kham sngew shyrkhei eh ïa ka jylla ka long ba Meghalaya ruh kadei ka jylla kaba trei ïa ki kam pynroi da kaba shim da ka ram. Kaba bun na kane ka ram kadei kaba la shim na ka World Bank, Asian Development Bank bad kiwei kiwei ki bor bei tyngka. Kane ka jingshim ram ka Meghalaya kadei kaba la pynshisha ne kyrshan (gaurantor) da ka sorkar pdeng.
Kiba bun kiba tip bha shaphang ka rukom shim bad ka rukom siew ïa ka ram, ki buh ka jingkylli mano bad da kumno ka jylla kan siew ïa kane ka ramkaba la poi shajan ka Khatsan hajar klur tyngka. Ka jingïakren ka ïaid ruh ba ka sorkar kaban shimti hadien kane ka elekshon 2023 kan mad ïa ka jingeh kaba khraw ban siew ïa kane ka ram kaba haduh mynta ym tip shuh katno ka la poi. Hynrei kaba khamshai hi ka long ba ka ram ka long da ki hajar klur tyngka bad ka lah ruh ban poi da ki phew hajar klur tyngka.
Ki khubor ba la ïoh lum da u Mawphor, ki ïathuh ba ki bor jong ka sorkar pdeng khamtam kiba dei ha ki kam pisa pilaiñ ki dang shu peitkai la ka Meghalaya ka lah ne em ban siew ïa kane ka ram. Ka daw ka long ba ka Meghalaya ka duna bha ka jingïoh lum bai musur ne khajna. Ka jingshah khang tih bad khaïi dewïong naduh u snem 2014, ka la ktah jur ïa ka jingïoh lum khajna ka sorkar jylla. Wat hadien ba la pynjynsur khyndiat ïa ka kam khaïi dewïong, pynban ka jingkhaïi kadei kaba la shu leh beaiñ, kaba mut ba ka sorkar kam ïoh lum khajan satia, namar ba ka jingsiew khajna ïa u dewïong ka leit sha ki bym dei sorkar ne sha ki riew shimet bad ki kynhun.
Ka khubor kaba la ïoh ka ong ba lada jia ba ka Meghalaya kam lah ban siew ïa kane ka ram, ka sorkar pdeng kan pyndonkam da kawei ka buit bad kata ka long ban map noh ïa ka ram bad kan ïapeiñ pat da kaba shim ïa ki jaka ban tih Uranium.
Ka khubor ka ong ba kam da shai bha kane ka jingthmu ha kano ka dur kane ka rukom ïapynbeit kan long, hynrei kaba kham shai hi ka long ba u Uranium na Meghalaya un long kum ka jingsiew ïa ka ram kaba la shim da ka Meghalaya.
